Владислав Радимов Сафоновнинг карьера чўққиси ҳақида фикр билдирди

Собиқ «Зенит» футболчиси Владислав Радимов Матвей Сафоновнинг «Фламенго»га қарши FIFA Қитъаларо кубоги финалидаги ўйинини алоҳида эътироф этди. «Сафонов карьерасининг чўққисига чиқдими, деган саволга келсак, ростини айтсам, Матвей ҳозир кўрсатганидан ҳам яхшироқ ўйнашнинг иложи йўқ», деди Радимов «Матч ТВ» эфирида.

Финалдан кейинги пенальтилар сериясида Сафонов кетма-кет тўртта зарбани қайтарди ва шу тариқа «ПСЖ»га ғалабани ҳамда 2025 йилдаги олтинчи совринни тақдим этди. Россиялик дарвозабон учрашувнинг энг яхши футболчиси деб топилди, унинг натижаси эса тарихда қайд этилди.

Шунингдек, аввалроқ Сафонов сўнгги зарбаларни қўли синган ҳолда қайтаргани маълум бўлди. Эндиликда уни узоқ муддатли тикланиш жараёни кутмоқда.