«Бока Хуниорс» клубида янги спорт директори тайинланди

Аргентина гранди «Бока Хуниорс» янги спорт директори ким бўлишини расман эълон қилди: бу лавозимни Марсело Делгадо эгаллади. У клуб президенти Хуан Рикелме билан яқин ҳамкорликда ишлайди. Бу ҳақда euro-football.ru хабар беради.

Жамоа таркибни тезроқ кучайтиришга муҳтож, шу боис Делгадо ва Рикелме трансферлар ҳамда жамоани мустаҳкамлаш масалаларида фаол иш олиб бориши кутилмоқда.

Делгадо футболчилик фаолиятида ҳам ном қозонган. У 1995–2002 йиллар оралиғида Аргентина терма жамоасида 18 учрашув ўтказган, жумладан 1998 йилги Жаҳон чемпионатида ҳам иштирок этган.

Шунингдек, у 2003 йилда Либертадорес кубогининг энг яхши тўпурари бўлган — «Сантос» ҳужумчиси Рикардо Оливейра билан бирга мусобақада энг кўп гол урган футболчилар қаторидан жой олган.