Алиссон Чемпионлар лигасисиз ҳам Ювентусга ўтишга рози бўлди
Ливерпул дарвозабони Алиссон Беккер келаётган ёзги трансфер ойнасида Ювентус сафига қўшилишга тайёр. Бразилиялик посбон Турин клубининг янги лойиҳасига тўлиқ ишонмоқда ва жамоа келаси мавсумда Чемпионлар лигасига йўлланма ололмаса ҳам, А Серияга қайтишга қарор қилган. Ла Gazzetta делло Sport нашрининг хабарига кўра, дарвозабон трансфер бўйича Турин клубига яшил чироқ ёққан. Бу ҳақда Goal.com хабар беради.
Ҳозирда Луциано Спаллетти қўл остидаги Ювентус турнир жадвалида олтинчи ўринда бормоқда ва Европанинг энг нуфузли мусобақасидан қуруқ қолиш хавфи остида турибди. Шунга қарамай, Алиссоннинг вакиллари футболчининг ҳар қандай ҳолатда ҳам Туринга кўчиб ўтиш истаги қатъий эканини тасдиқлашди. Тажрибали дарвозабон якшанба куни Брентфордга қарши ўйинда Ливерпул мухлислари билан хайрлашишга тайёргарлик кўрмоқда.
Арне Слот бразилиялик посбонни асосий таркибда майдонга тушириши кутилмоқда, бу эса унга Мерсисайдаги саккиз йиллик фаолиятига муносиб якун ясаш имконини беради. Ливерпул сафида Алиссон икки бор Англия Премер-лигаси, Чемпионлар лигаси ва бошқа кўплаб совринларни қўлга киритди. Бироқ сўнгги вақтлардаги жароҳатлар ва Гиорги Мамардашвили трансфери унинг жамоадаги ўрнини сўроқ остида қолдирди.
Алиссоннинг Ливерпул билан шартномаси 2027-йилгача амал қилади, шу сабабли Ювентус трансфер борасида инглиз клуби билан келишиб олиши керак. Туринликлар бразилиялик посбонни жамоанинг қайта тикланиш жараёнидаги асосий етакчи сифатида кўрмоқда. Музокаралар яқин уч ҳафта ичида, яни Жаҳон чемпионати бошлангунга қадар якунланиши режалаштирилган.
