Реал Мадрид президентлигига номзод клуб хусусийлаштирилиши ҳақида огоҳлантирди
Реал Мадрид президентлиги учун курашаётган Энриқуе Риқуелме бўлажак сайловлар клуб аъзолари ўз сўзини айта оладиган сўнгги имконият бўлиши мумкинлигини таъкидлади. Тадбиркорнинг сўзларига кўра, агар амалдаги раҳбариятга муносиб муқобил топилмаса, Испания гиганти хусусийлаштириш йўлига ўтиб кетиши хавфи бор. Бу ҳақда Goal.com хабар беради.
Кох Груп ижрочи президенти Энриқуе Риқуелме Эхпансион нашрига берган интервюсида Реал Мадрид келажаги борасида шов-шувли баёнот берди. У клубнинг анъанавий моделидан узоқлашаётганидан хавотирда эканини билдирди. Маълумки, ўтган йили Флорентино Перез клубнинг бир қисмини инвесторларга сотиш режасини эълон қилган эди, бу эса аъзолар эгалигидаги клуб учун катта ўзгариш ҳисобланади.
"Бу Реал Мадрид тарихидаги охирги сайловлар бўлиши мумкин, чунки хусусийлаштириш жараёни яқинлашмоқда. Бизнинг ахлоқий ва маънавий бурчимиз — клуб аъзоларига тегишли бўлиб қолишини таъминлашдир," — деди Риқуелме. У ҳозирда ўз номзодини расмийлаштириш ва шанба кунигача энг яхши лойиҳани тақдим этиш устида ишламоқда.
Президентликка йўл молиявий кафолатлар ва аъзолик муддати каби қатъий қоидалар туфайли жуда қийин бўлса-да, Риқуелме демократик муқобил яратиш зарурлигини таъкидлади. Унинг фикрича, ҳатто унинг номзоди ғалаба қозонмаса ҳам, таклиф этаётган ғоялари клуб сифатини яхшилашга хизмат қилиши керак.
