Манчестер Юнайтед Коул Палмер учун қанча тўлаши маълум бўлди
Челси жамоаси жорий ёзги трансфер ойнасида жиддий молиявий босимга дуч келмоқда. Янги бош мураббий Хаби Алонсо ўзи истаган футболчиларни сотиб олиш учун таркибдаги етакчи иқтидорларни қурбон қилишига тўғри келиши мумкин. Манчестер Юнайтед қизиқиш билдираётган Коул Палмер учун Лондон клуби улкан нарх белгилади. Потенциал харидорларга иқтидорли плеймейкер бўйича музокараларни бошлаш учун зарур бўлган аниқ сумма маълум қилинди. Бу ҳақда Goal.com хабар беради.
Те Сун нашрининг хабар беришича, Челси футболчиларни сотиш борасида қийин танлов қаршисида турибди. Кўплаб экспертларнинг фикрича, клуб молиявий балансни тиклаш ва Алонсога камида учта юқори савиядаги трансферни амалга ошириш учун маблағ яратиб бериш мақсадида таниқли номлар билан хайрлашиши шарт. Еврокубоклардан қуруқ қолиш вазиятни янада оғирлаштирди, чунки жамоа мавсумни 10-ўринда якунлади.
Клуб раҳбарияти Энзо Фернандезни сотишни энг мақбул вариант деб ҳисобласа-да, унинг трансфер қиймати ва шартномаси битимни мураккаблаштиради. Аргентиналик ярим ҳимоячи учун камида 100 миллион фунт стерлинг талаб қилинади. Шу сабабли, бошқа ўйинчилар, жумладан Марк Кукурелла ва Жоау Педро каби футболчилар ҳам сотувга қўйилиши мумкин. Ҳозирда фақат Моисес Кайседо дахлсиз актив сифатида кўрилмоқда.
Бундай молиявий жумбоқлар фонида Коул Палмер масаласи диққат марказига чиқди. 2023-йилда Манчестер Сити сафидан келиб қўшилган ҳужумчи Челси сафида ажойиб ўйин кўрсатиб келмоқда. Унинг амалдаги шартномаси 2033-йилгача давом этади, бу эса клубга музокараларда устунлик беради. Маълум қилинишича, Палмерни сотиб олиш бўйича музокараларни бошлаш учун минимал сумма 80 миллион фунт стерлинг ($108м) этиб белгиланган.
Агар Манчестер Юнайтед ёки бошқа бир Европа гранди Палмер учун расмий таклиф билан чиқса, бу Челси раҳбариятининг иродасини жиддий синовдан ўтказади. Яқин ҳафталар ичида Лондон клуби ўз талабида қатъий туриши ёки молиявий реалликка тан бериб, ўз юлдузини қўйиб юбориши маълум бўлади.
