Илон Маск OpenAI компаниясига қарши суд жараёнида ютқазди
Окленддаги федерал суд Илон Маскнинг OpenAI компаниясига қарши даъвосини рад этди. Суд қарорига кўра, миллиардер ўзи асос солишда иштирок этган компанияга нисбатан эътирозларини жуда кеч билдирган. Ҳакамлар ҳайъати икки соатдан камроқ вақт давом этган муҳокамадан сўнг бир овоздан шундай хулосага келди. Бу ҳақда Ixbt.com хабар беради.
Илон Маск 2024-йилда берган даъвосида OpenAI раҳбари Сем Алтман ва президент Грег Брокманни дастлабки келишувларни бузганликда айблаган эди. Унинг сўзларига кўра, нотижорат ташкилот сифатида яратилган компания кейинчалик Microsoft каби ҳамкорлардан миллиардлаб доллар сармоя жалб қилиб, фойда кўзловчи бизнесга айлантирилган. Маск лойиҳага 38 миллион доллар сармоя киритганини ва компания тузилмаси ўзгартирилгач, жараёндан четлатилганини таъкидлаган.
OpenAI вакиллари эса Маскнинг даъвоси асоссиз эканини ва у сунъий интеллект бозори катта молиявий ўсишга эришганидан сўнггина эътироз билдиришга қарор қилганини таъкидлади. Суд жараёни 11 кун давом этди ва сунъий интеллект соҳасидаги энг шов-шувли баҳслардан бирига айланди. Томонлар суд давомида бир-бирининг обрўсига путур етказишга уринишди.
OpenAI 2015-йилда Сем Алтман, Илон Маск ва бошқа тадбиркорлар томонидан нотижорат ташкилот сифатида ташкил этилган. Маск 2018-йилда директорлар кенгашини тарк этган, 2019-йилда эса компания инвестицияларни жалб қилиш учун тижорат бўлинмасини яратган эди. Ҳозирда OpenAI Google DeepMind, Anthropic ва Маскнинг ўзига тегишли xAI компанияси билан рақобатлашмоқда.
