Илмий фантастика каби: SpaceX компаниясининг Super Heavy ракетаси тунда кўчирилди

SpaceX компанияси Техасдаги Старбасе ҳудудида Super Heavy Booster 19 тезлатгичини тунги вақтда ташиш жараёнини амалга оширди. Икки дақиқалик видеолавҳада улкан ракета босқичи ўзиюрар модулли СПМТ платформасида компания штаб-квартираси ёнидан секинлик билан ўтаётгани акс этган. Ташиш жараёни қоронғу вақтда ва кучли шамол шароитида ўтди. Бу ҳақда Ixbt.com хабар беради.

Booster 19 базадаги офислар, техникалар ва одамлар фонида жуда салобатли кўринади. Бу жараён худди илмий фантастик фильмдаги саҳналарни эслатади. Ҳозирда SpaceX Starship ракетасининг навбатдаги синов парвозига фаол тайёргарлик кўрмоқда, унинг санаси 22-майга белгиланган.

Starship бугунги кунда тарихдаги энг йирик ва энг кучли ракета тизими ҳисобланади. Комплекснинг умумий баландлиги 124 метрни ташкил этади ва Elon Muskнинг сўзларига кўра, келажакда ракета яна 15–20 фоизга катталашиши мумкин.

SpaceX раҳбари Elon Musk Starship ишлаб чиқариш линияси тўлиқ юкланганини маълум қилди. Компания йил охирига қадар яна 10 та Starship кемаси ва 5 та Super Heavy тезлатгичини қуришни режалаштирмоқда.