Kalulyu hakam xatosiga qaramay bir o'yinga chetlatildi

Italiya A Seriyasi rasmiy sayti o'tgan tur yakunlariga ko'ra intizomiy qarorlarni e'lon qildi. Diskvalifikatsiya olgan futbolchilar ro'yxatidan «Yuventus» himoyachisi Pyer Kalulyu ham joy oldi — fransuz futbolchi bir uchrashuvga chetlatildi. Bu haqda euro-football.ru xabar beradi.

Kalulyuning maydondan chetlatilishi bahsli holat bo'lgani aytilmoqda: hakamlar korpusi rahbari Janluka Rokki futbolchiga ikkinchi sariq kartochka noto'g'ri ko'rsatilgani uchun uzr so'ragan. Biroq qoidaga ko'ra, qizil kartochka qayd etilgani sabab diskvalifikatsiya kuchda qoldi.

Shu tariqa Pyer Kalulyu A Seriyada «Komo»ga qarshi o'yinda «Yuventus»ga yordam bera olmaydi. Uchrashuv 21 fevral, shanba kuni bo'lib o'tadi.