АҚШ президенти Дональд Трамп Truth Social платформасида нейрон тармоқ ёрдамида яратилган видеони эълон қилди. Мазкур видеода Трамп Оқ уй Овал кабинетигада Португалия терма жамоаси ва «Ал-Наср» клуби ҳужумчиси Криштиану Роналду билан футбол ўйнаётганини кўриш мумкин.
18 ноябр куни Криштиану Роналду Саудия Арабистони валиаҳд шаҳзодаси Муҳаммад бин Салмоннинг АҚШга ташрифи муносабати билан Оқ уйда ташкил этилган расмий кечада қатнашган эди. Криштиану Роналду тарихдаги энг самарали футболчилардан бири ҳисобланади.
У миллий терма жамоалар, Европа чемпионатлари ва Чемпионлар лигаси тарихида энг кўп гол урган футболчи саналади. Шунингдек, Роналду расмий учрашувларда 900 та гол уриш чегарасига етган дунёдаги биринчи футболчидир. Ҳозирги кунда унинг урган голлари сони 953 тани ташкил қилади.
Унинг ҳисобида 5 та Чемпионлар лигаси ғолиблиги, 2016 йилги Европа чемпионлиги ва икки марта УЕФА Миллатлар лигаси ғолиблиги бор.
