Европа футболида яна катта шов-шувга сабаб бўладиган хабарлар пайдо бўлди. Оммавий ахборот воситаларида тарқалаётган маълумотларга кўра, “Реал” раҳбарияти бош мураббий Альваро Арбелоа билан хайрлашиш ва унинг ўрнига тажрибали мутахассис Жозе Моуриньони таклиф қилиш вариантини кўриб чиқмоқда.
Мадрид клуби атрофидаги бу гап-сўзлар шунчаки мураббий алмашинуви билан чекланиб қолмаяпти. Чунки хабарларга қараганда, Моуриньо “Реал”га қайтган тақдирда, янги жамоаси сафида кўришни истайдиган футболчилар рўйхатини ҳам шакллантира бошлаган.
Football365 нашри The Independent журналисти Мигел Деланига таяниб хабар беришича, португалиялик мутахассис “Барселона”да тўп сураётган Маркус Рэшфордни Мадридга олиб келишни хоҳламоқда.
Бу трансфер атрофидаги вазият айниқса қизиқ. Чунки Рэшфорд ҳозир “Барселона” шарафини ҳимоя қилаётган бўлса-да, унинг ҳуқуқлари аслида “Манчестер Юнайтед”га тегишли. Англиялик ҳужумчи Каталония клубида ижара асосида ўйнамоқда. “Барселона” эса ҳали унинг тўлиқ трансферини амалга ошириш ёки оширмаслик бўйича якуний қарор қабул қилгани йўқ.
Айнан шу ноаниқликдан “Реал” фойдаланиши мумкинлиги айтилмоқда. Моуриньо Рэшфордни яхши билади, футболчининг кучли ва заиф томонларидан хабардор. Улар 2016 йилдан 2018 йилгача “Манчестер Юнайтед”да бирга ишлаган. Шу сабабли португалиялик мураббий англиялик ҳужумчининг имкониятларига бегона эмас.
Мигел Делани таъкидлашича, Моуриньо ва Рэшфорд ўртасида яхши муносабатлар сақланиб қолган. Шу боис, агар Жозе Мадридга йўл олса, у Рэшфордни ўз лойиҳасининг муҳим қисмларидан бири сифатида кўриши мумкин.
Бу ерда яна бир нозик жиҳат бор. Рэшфордни “Реал”га олиб келиш нафақат жамоани кучайтириш, балки “Барселона” режаларига жиддий зарба бериш имконияти ҳам бўлиши мумкин. Агар каталонияликлар футболчини сақлаб қолишни истаса-ю, “Реал” бу жараёнга аралашса, трансфер бозорида яна бир қизғин рақобат бошланади.
Моуриньо учун Рэшфорд таниш футболчи. У тезкор, ҳужумда бир неча позицияда ўйнай олади, катта ўйинлар босимига мослашган ва ҳали ҳам юқори даражада фойда келтира оладиган салоҳиятга эга. Бундай ўйинчи ҳар қандай мураббий учун қулай қурол ҳисобланади.
“Реал” эса ҳар доим номдор футболчилар ва катта характер эгалари билан ишлашга ўрганган клуб. Агар Моуриньо ҳақиқатан ҳам Мадридга қайтса, у жамоага шунчаки тактик ўзгариш эмас, балки ўзига хос кескинлик, интрига ва рақобат муҳитини ҳам олиб келиши аниқ.
Ҳозирча бу маълумотлар расмий тасдиқлангани йўқ. Аммо футболда шундай вазиятлар борки, аввал миш-миш сифатида бошланади, кейин эса бутун бозорни силкитадиган воқеага айланади. Моуриньо, “Реал”, “Барселона” ва Рэшфорд номи бир хабарда келса, демак, сериал бошланди. Энди попкорнни тайёрлаб қўйиш керак.
“Zamin”ни Telegram'да ўқинг!
