Abduqodir Husanov bu mavsumda ham klub, ham terma jamoada o‘ziga xos samarali va ishonchli o‘yini bilan muxlislarni hayratga solmoqda. O‘zining qatʼiy va barqaror harakatlari orqali u jamoaviy sovrinlarni qo‘lga kiritishi bilan birga, shaxsiy yutuqlarini ham namoyon etmoqda.
Masalan, Husanov «Manchester Siti» safida Angliya Ligasi Kubogida g‘oliblikni qo‘lga kiritdi. U o‘z maydonidagi taʼsirli o‘yinlari tufayli yanvar va mart oylarida klubning eng yaxshi futbolchisi deb topildi va individual sovrinlarga sazovor bo‘ldi.
Shuningdek, 22 yoshli himoyachi O‘zbekiston milliy terma jamoasi bilan FIFA Series 2026 musobaqasida g‘oliblikni nishonladi. Husanov shuningdek yangi xalqaro turnirda eng yaxshi o‘yinchi deb topilib, yana bir muhim individual mukofotga ega bo‘ldi.
Klub rahbariyati o‘zbek futbolchisining tez surʼatdagi rivojlanishi va erishgan natijalariga qarab, unga yangi, yaxshilangan shartnoma taklif qilishi mumkinligi haqida maʼlumotlar tarqatilmoqda.
Yevropaning nufuzli nashrlari ham Husanovga katta eʼtibor qaratmoqda. Masalan, The Athletic uni dunyoning eng kam baholangan futbolchilari sirasiga kiritdi. Uning tezligi, taktik tushunish qobiliyati va to‘p uchun berilgan kurashi alohida taʼkidlangan.
The Athletic nashri Abduqodir Husanov haqida shunday yozdi: “Husanov tabiatan kamgap, ammo u maydonda quruq gaplarsiz o‘zini isbotlaydi. Bu mavsumda u yaqqol o‘sishni namoyon qildi. Uning asosiy kuchli jihatlari — tezlik, o‘yinni aʼlo darajada tushunish va to‘p uchun agressiv kurash.
Husanov tabiatan kamgap va u o‘zini maydonda murosasiz o‘yini orqali namoyon qiladi.
Bu mavsumda u shunchalik rivojlandiki, “Manchester Siti”ning eng yaxshi o‘yinchisi, deb topildi”.
Mashhur jurnalist Genri Vinter ham Husanovning faoliyatini yuqori baholadi. Uning tezligi, atletizmi, maqsadga intilishi, kuchli paslari va maydondagi jasorati muxlislar va ekspertlar eʼtiborini tortmoqda.
Abduqodir Husanovni maqtash lozim. “Manchester Siti” markaziy himoyachisi yaqinda 22 yoshga to‘ldi, u hali o‘z o‘yinini takomillashtirmoqda, hali ham xatolarini to‘g‘rilamoqda, ammo tezligi, atletizmi va maqsadga intilishi bilan tobora ko‘proq taassurot qoldirmoqda.
Shuningdek, uning sodda, ammo samarali paslari va kuchli kurashga bo‘lgan muhabbati ham eʼtiborga loyiq. “Uembli”da Kay Xaversdan to‘pni tortib olish uchun orqaga yugurgani shunchaki hayratlanarli edi.
Husanov finalda yaxshi o‘ynadi, Viktor Dyokereshga qarshi o‘yinga moslashib bordi. U hali ham baʼzan shoshqaloq podkatlar qiladi. U Dyokereshni to‘xtatdi, ammo sariq kartochka uni chalg‘itmadi. Keyingi soat davomida u yana duellarda g‘alaba qozonishga eʼtibor qaratdi.
Husanovning salohiyati va xarakteri hech qachon shubha ostida bo‘lmagan. “Siti”dagi debyutidan beri u maydonda xatolardan to‘g‘ri saboq olib, professional rivojlanishini davom ettirmoqda.
2025 yil yanvarda “Siti”dagi debyutida u mahalliy tilni bilmas edi va atigi ikki marta mashg‘ulot o‘tkazgan edi. O‘yin boshida ikki xato qildi, “Chelsi”ga gol urish imkonini berdi va Koul Palmerga qarshi qoidabuzarlik uchun sariq kartochka oldi. Ammo Abduqodir o‘ynashda davom etdi va “Siti”dagi karyerasini ham rivojlantira boshladi. Klub uni “Bizning o‘zbek jangchimiz”, deb ataydi.
Skautlar uning potensialiga erta eʼtibor qaratgan va “Lans”dan 33,6 million funtga sotib olgan. Shuningdek, “Lans” skautlari ham Husanov Belarusda “Energetik-BGU” jamoasida o‘ynaganida unga eʼtibor qaratganini ham alohida tilga olish lozim. Husanov hali ham ayrim jihatlarda, ayniqsa havodagi kurashlarda o‘z ustida ko‘proq ishlashi kerak, ammo u yuqori darajali markaziy himoyachiga aylanish uchun barcha imkoniyatlarga ega. Va u hali atigi 22 yoshda.
Abduqodir Husanov esa shu kunga qadar o‘z salohiyati va maydondagi qatʼiyligi bilan barcha muxlislarni hayratda qoldirmoqda.
“Zamin”ni Telegramʻda oʻqing!
