Bavariya hujumchisi Harry Kane 2025-26-yilgi mavsum yakunlariga koʻra Yevropaning eng yaxshi toʻpurari sifatida rasman "Oltin butsa" sovrini bilan taqdirlandi. Angliya terma jamoasi sardori Manchester Siti forvardi Erling Xoland va Real Madrid yulduzi Kylian Mbappe ustidan ishonchli gʻalabaga erishib, qitʻaning eng xavfli hujumchisi ekanligini yana bir bor isbotladi. Bu haqda Goal.com xabar beradi.
Kane Germaniya Bundesligasining 31 ta oʻyinida 36 ta gol urib, 72 ochko jamgʻarishga muvaffaq boʻldi. Bu natija 32 yoshli hujumchini reytingning mutlaq yetakchisiga aylantirdi. U 27 ta gol bilan 54 ochko toʻplagan Erling Xolanddan naqd 18 ochkoga oʻzib ketdi. Shu tariqa, Harry Kane klub afsonalari Gerd Muller va Robert Lewandowski kabi ushbu nufuzli sovrinni Bavariya safida ikki marta yutgan futbolchilar qatoriga qoʻshildi.
2023-24-yilgi mavsumda ham ushbu mukofotni qoʻlga kiritgan Kane, joriy yilda barcha musobaqalarda fenomenal natija qayd etdi. U umumiy hisobda 51 ta uchrashuvda 61 ta gol urishga erishdi. Shundan 14 tasi Chempionlar ligasi, 10 tasi esa Germaniya kubogi bahslariga toʻgʻri keldi. Uning sermahsulligi Bavariya jamoasiga Bundesliga va mamlakat kubogida zafar quchishga yordam berdi.
Oʻz yutuqlari haqida gapirar ekan, Kane: "Bu shaxsan mening faoliyatimdagi eng yaxshi mavsum boʻldi", — deya taʻkidladi. Garchi Kane bosh sovrinni qoʻlga kiritgan boʻlsa-da, uning raqiblari ham yuqori saviyani saqlab qolishdi. Erling Xoland Manchester Siti bilan Angliya Premer-ligasida toʻpurar boʻldi, Kylian Mbappe esa Real Madrid safida ketma-ket ikkinchi bor La Liga toʻpurarligini qoʻlga kiritdi.
“Zamin”ni Telegramʻda oʻqing!
