Argentina terma jamoasi yulduzi Angel Di Maria Manchester Yunayteddagi omadsiz faoliyati haqida ochiqchasiga gapirib berdi. 59,7 million funt evaziga rekord darajadagi transfer sifatida kelgan va afsonaviy 7-raqamni olgan futbolchi Angliya Premer-ligasida bor-yoʻgʻi bir mavsum toʻp surdi. Uning soʻzlariga koʻra, taktik kelishmovchiliklar va shaxsiy muammolar uning Old Trafforddagi hayotini dahshatga aylantirgan. Bu haqda Goal.com xabar beradi.
Muvaffaqiyatsizlikning asosiy sababi sifatida Di Maria oʻsha paytdagi murabbiy Louis van Gaal bilan yomon munosabatlarini koʻrsatdi. "Hammasi juda yaxshi boshlangan edi, ammo keyin Van Gaal bilan muammolar yuzaga keldi va hamma narsa barbod boʻldi", — deydi futbolchi. Uning taʼkidlashicha, murabbiy doimiy ravishda faqat xatolarni tahlil qilgan va ijobiy jihatlarga eʼtibor bermagan, bu esa futbolchining bezor boʻlishiga olib kelgan.
Maydondan tashqaridagi hayot ham Di Maria uchun ogʻir kechgan. Cheshirdagi uyiga oʻgʻri tushishga urinishi va oilasining xavfsizligi borasidagi xavotirlar vaziyatni yanada murakkablashtirgan. "U yerda hayot butunlay boshqacha edi. Erta qorongʻu tushishi va sovuq ob-havo ham taʼsir qildi. Parijda ham oʻgʻrilik boʻlgan, lekin u yerda hayot sifati yaxshi boʻlgani uchun qolganman. Manchesterda esa hammasi bir-biriga ulanib ketdi", — deya qoʻshimcha qildi u.
Futbolchining rafiqasi Jorgelina Cardoso ham Angliyadagi hayot haqida keskin fikr bildirdi. U Manchesterdagi taomlar, ob-havo va odamlardan norozi boʻlganini yashirmadi. Ular Madridda dunyoning eng yaxshi jamoasi Real Madrid safida baxtli yashashganini, Manchester Yunayted taklifi esa barcha qulayliklardan voz kechishga majbur qilganini taʼkidladi. Yakunda Di Maria oilasini birinchi oʻringa qoʻyib, Angliyani tark etishga qaror qilgan.
“Zamin”ni Telegramʻda oʻqing!
