Al-Nassr klubidagi Ronaldo sulolasi oʻzining yangi qahramonlarini kashf etishda davom etmoqda. Cristiano Ronaldoʻning kichik oʻgʻli Mateo uzoq masofadan jarima zarbasini qoyilmaqom tarzda amalga oshirib, ijtimoiy tarmoqlarda virusga aylandi. Mazkur gol videosini Georgina Rodriguez oʻzining Instagram sahifasida ulashdi. Bu haqda Goal.com xabar beradi.
Videoda Mateo Ronaldo Al-Nassr Future Talents akademiyasi safida toʻp surayotgani va jarima zarbasini xuddi otasiga xos uslubda ijro etgani aks etgan. Besh karra "Oltin toʻp" sohibining texnikasini eslatuvchi kuchli zarba toʻgʻridan-toʻgʻri darvoza toʻridan joy oldi. Georgina ushbu videoga "Xuddi otang Cristiano kabi" deya izoh qoldirib, oʻgʻlining muvaffaqiyatidan faxrlanishini bildirdi.
Bu Mateoning ijtimoiy tarmoqlarda birinchi bor diqqat markaziga tushishi emas. Avvalroq u yopiq maydondagi mashgʻulotlar paytida golini otasining mashhur "Siu" uslubida nishonlab, koʻpchilikning mehrini qozongan edi. Koʻrinib turibdiki, Ronaldoning futbol genlari keyingi avlodga ham muvaffaqiyatli oʻtmoqda.
Ronaldo oilasining yutuqlari faqat Mateo bilan cheklanib qolmaydi. Katta oʻgʻli Cristiano Junior allaqachon Al-Nassr U-13 jamoasi bilan Saudiya Arabistoni yoshlar chempionligini qoʻlga kiritishga ulgurdi. Katta Cristiano Ronaldo yaqinda asosiy jamoa bilan Saudiya Pro-ligasida gʻolib chiqqan boʻlsa, uning farzandlari ham yoshlikdanoq sovrinlar kolleksiyasini boyitmoqda.
“Zamin”ni Telegramʻda oʻqing!
