Arsenal yarim himoyachisi Declan Rice Chempionlar ligasi finali oldidan oʻzining katta oʻyinlardagi tajribasi va jamoaning maqsadlari haqida toʻxtalib oʻtdi. Angliya Premer-ligasi chempionligini qoʻlga kiritgan London klubi endi Budapeshtda Pari Sen-Jermen jamoasiga qarshi tarixiy dublni qayd etish uchun maydonga tushadi. Rice avvalroq Vest Xem sardori sifatida Konferensiyalar ligasida gʻolib chiqqan boʻlsa-da, Chempionlar ligasi finali uning faoliyatidagi eng yuqori nuqta boʻlishini taʼkidladi. Bu haqda Goal.com xabar beradi.
27 yoshli futbolchi uefa.com saytiga bergan intervyusida oʻzini katta bosim ostida oʻynashga tayyor deb bilishini aytdi. "Men oʻzimni katta oʻyinlar futbolchisi deb aytgan boʻlardim. Eng nufuzli musobaqalarda qatnashayotganingizda, jamoaning har bir aʼzosi masʼuliyatni oʻz zimmasiga olishi kerak. Biz soʻnggi yillarda, ayniqsa Chempionlar ligasida buni uddalay olishimizni isbotladik. Finalda ham aynan shu xislatimiz bizga juda asqotadi", — dedi Rice.
Yarim himoyachi faoliyati davomida nafaqat gʻalabalarni, balki ogʻriqli magʻlubiyatlarni ham boshdan kechirgan. Angliya terma jamoasi bilan ikki bor Yevropa chempionati finallarida magʻlub boʻlgani uni yanada kuchliroq qilganini taʼkidladi. Uning soʻzlariga koʻra, har bir boy berilgan final gʻalaba qozonishga boʻlgan ishtiyoqni yanada oshiradi va Luis Enrique boshchiligidagi PSJga qarshi bahsda qoʻshimcha motivatsiya boʻlib xizmat qiladi.
Oʻtgan mavsumda aynan Parij klubiga yarim finalda imkoniyatni boy bergan Arsenal bu safar xatolardan xulosa chiqargan. Rice oʻtgan yilgi magʻlubiyatdan olingan asosiy dars — yaratilgan imkoniyatlardan unumli foydalanish ekanligini aytdi. "PSJ — juda kuchli jamoa. Oʻtgan yili bizda koʻplab vaziyatlar boʻlgan edi, ammo ularni golga aylantira olmagandik. Bu safar bor kuchimizni ishga solib, mavsumni orzu qilingan kubok bilan yakunlamoqchimiz", — deya qoʻshimcha qildi futbolchi.
“Zamin”ni Telegramʻda oʻqing!
