“Arsenal” jamoasi “Aston Villa” yulduzi Morgan Rogersni qoʻlga kiritish uchun jiddiy harakat boshladi. Xabarlarga koʻra, Mikel Arteta ushbu transfer jarayonini shaxsan oʻz nazoratiga olgan. Angliya terma jamoasi aʼzosiga “Chelsi” va “Manchester Yunayted” ham qiziqish bildirmoqda, biroq “villanlar” oʻz futbolchisi uchun katta miqdorda mablagʻ talab qilishi kutilmoqda. Bu haqda Goal.com xabar beradi.
talkSPORT nashrining maʼlum qilishicha, Mikel Arteta joriy yozgi transfer oynasida klubning seleksiya strategiyasiga bevosita aralashmoqda. 22 yillik tanaffusdan soʻng Angliya Premer-ligasi chempionligini qoʻlga kiritgan “kanonirlar” ustozi jamoaning toʻxtab qolishini istamayapti va Rogersni hujum chizigʻini kuchaytirish uchun ideal nomzod deb hisoblamoqda.
Hozirda futbolchining vakillari bilan dastlabki muzokaralar oʻtkazilgani aytilmoqda. Biroq 23 yoshli futbolchi uchun raqobat ancha kuchli. “Chelsi” vaziyatni diqqat bilan kuzatib borayotgan boʻlsa, “Manchester Yunayted” texnik direktori Jeyson Uilkoks sobiq “Manchester Siti” akademiyasi tarbiyalanuvchisining ashaddiy muxlisi hisoblanadi.
“Aston Villa” esa oʻz yetakchisini sotishga shoshilmayapti. Unai Emery shogirdi Yevropa ligasi finalida “Frayburg” darvozasiga gol urib, jamoasining 3:0 hisobidagi gʻalabasiga hissa qoʻshganidan soʻng, uning qiymati yanada oshdi. Birmingemliklar Rogersni kamida 80 million funtga baholamoqda, ammo raqobat kuchaysa, bu narx 100 million funtgacha koʻtarilishi mumkin.
Mikel Arteta Rogersning maydon markazida ham, qanotlarda ham birdek samarali oʻynay olishini yuqori baholamoqda. Uning kelishi Gabriel Martinelli va Leandro Trossard kabi futbolchilar oʻrtasida sogʻlom raqobatni kuchaytirishi kutilmoqda. “Arsenal” Chempionlar ligasi va ichki chempionatdagi maqsadlari yoʻlida tarkibni elita darajasidagi ijrochilar bilan toʻldirishni koʻzlamoqda.
“Zamin”ni Telegramʻda oʻqing!
