21-ноябр 2025-йил, 10:18. UzAuto Motors компанияси Chevrolet Cobalt автомобилларини расмий дилерлар орқали сотишни бошлаганини эълон қилди.
Бу қарор 3-ноябр куни онлайн платформа орқали тузилган айрим шартномалар бекор қилинганидан сўнг қабул қилинди. Ўша куни компания 100 мингта автомобильни сотувга қўйган эди, уларнинг атиги 20,8 мингтаси белгиланган 7 кунлик муддатда тўланган.
“UzAuto Motors” АЖ тўлов муддати якунлангач, Chevrolet Cobalt автомобилларининг расмий дилер салонларида сотилишини бошлашга қарор қилди”, дейилади компания баёнотида. Мижозлар дилерлик марказини, мавжуд автомобилларни ва қўшимча ускуналарни танлаш имконига эга бўлишади.
Шартномалар UzAuto Motors’нинг ягона тизими орқали тузилади ва уларнинг ҳақиқийлигини тасдиқловчи QR-кодга эга. 20-ноябр ҳолатига кўра, дилерларга 2,6 минг дона Cobalt етказилган бўлиб, улардан 1,9 мингтаси сотилган ва харидорларга топширилган.
Яна 6 мингта автомобиль етказиб бериш жараёнида. Компания дилерлар орқали сотувлар онлайн шартномалар бўйича ўз мажбуриятларига таъсир қилмаслигини таъкидлади: ноябр ойида етказиб берилиши режалаштирилган автомобилларнинг ярмидан кўпи аллақачон эгаларига топширилган.
15-декабрга қадар компания 2025-йил декабр ва 2026-йил январ ойларида етказиб бериладиган автомобилларни тайёрлашни режалаштирмоқда. UzAuto Motors, шунингдек, ижтимоий тармоқларда Cobalt сотувига оид коррупция схемалари ҳақида тарқалган хабарларни изоҳлади.
Компания мазкур хабар муаллифи далиллар келтирмаганини маълум қилди ва мижозларни ҳар қандай ноқонуний ҳолатлар ҳақида Комплаенс департаментига хабар беришга чақирди.
Меҳмон гуруҳидаги фойдаланувчилар ушбу мақолага изоҳ қолдира олмайди.
