21-noyabr 2025-yil, 10:18. UzAuto Motors kompaniyasi Chevrolet Cobalt avtomobillarini rasmiy dilerlar orqali sotishni boshlaganini e'lon qildi.
Bu qaror 3-noyabr kuni onlayn platforma orqali tuzilgan ayrim shartnomalar bekor qilingandan so'ng qabul qilindi. O‘sha kuni kompaniya 100 mingta avtomobilni sotuvga qo‘ygan edi, ularning atigi 20,8 mingtasi belgilangan 7 kunlik muddatda to‘langan.
“UzAuto Motors” AJ to‘lov muddati yakunlangach, Chevrolet Cobalt avtomobillarining rasmiy diler salonlarida sotilishini boshlashga qaror qildi”, deyiladi kompaniya bayonotida. Mijozlar dilerlik markazini, mavjud avtomobillarni va qo‘shimcha uskunalarni tanlash imkoniga ega bo‘lishadi.
Shartnomalar UzAuto Motors’ning yagona tizimi orqali tuziladi va ularning haqiqiyligini tasdiqlovchi QR-kodga ega. 20-noyabr holatiga ko‘ra, dilerlarga 2,6 ming dona Cobalt yetkazilgan bo‘lib, ulardan 1,9 mingtasi sotilgan va xaridorlarga topshirilgan.
Yana 6 mingta avtomobil yetkazib berish jarayonida. Kompaniya dilerlar orqali sotuvlar onlayn shartnomalar bo‘yicha o‘z majburiyatlariga ta'sir qilmasligini ta'kidladi: noyabr oyida yetkazib berilishi rejalashtirilgan avtomobillarning yarmidan ko‘pi allaqachon egalariga topshirilgan.
15-dekabrga qadar kompaniya 2025-yil dekabr va 2026-yil yanvar oylarida yetkazib beriladigan avtomobillarni tayyorlashni rejalashtirmoqda. UzAuto Motors, shuningdek, ijtimoiy tarmoqlarda Cobalt sotuviga oid korrupsiya sxemalari haqida tarqalgan xabarlarni izohladi.
Kompaniya mazkur xabar muallifi dalillar keltirmaganini ma'lum qildi va mijozlarni har qanday noqonuniy holatlar haqida Komplaens departamentiga xabar berishga chaqirdi.
Mehmon guruhidagi foydalanuvchilar ushbu nashrga izoh qoldira olmaydi.
