2025 йил 29 ноябр куни Threads платформасида ҳижобларга оид мавзу катта баҳс-мунозараларга сабаб бўлди. Бу ҳолат Жасмин Таха исмли фойдаланувчи томонидан Одессадан Минскка кўчиб ўтиб, мусулмон аёллар учун бош кийимлар дўкони очмоқчи эканини эълон қилганидан сўнг юзага келди.
Ушбу пост қисқа вақт ичида вирусли бўлиб, унга 1,6 мингдан ортиқ фойдаланувчи муносабат билдирди, 3,4 мингдан зиёд изоҳ ва деярли 1 минг қайта улашув йиғди. Пост муаллифи ҳижобда тушган суратини жойлаб, Беларусда мусулмон аёллар учун кийим-кечак бренди яратишни режалаштираётганини маълум қилди.
Оддий бизнес ташаббуси сифатида кўрилиши керак бўлган бу эълон Беларусь ва Қозоғистон фойдаланувчилари ўртасида қизғин баҳсларга сабаб бўлди. Баъзи белоруслик фойдаланувчилар бу янгиликни оғир қабул қилишди.
Уларнинг фикрича, мусулмон кийимлари дўкони очилиши "миллий маданиятга таҳдид" бўлиши мумкин. Айримлар эса мусулмон давлатларда христиан атрибутлари билан боғлиқ дўконлар очилиши агрессияга сабаб бўлишини таъкидладилар.
Шу билан бирга, ҳижобга қарши нафратга нисбатан норозилик билдирганлар ҳам кўплаб учради. "Ҳижоб сотилиши мусулмонларнинг миграциясига олиб келмайди ва христиан аёлларни Ислом динига ўтказмайди.
Бу оддий кийим. Қиз солиқ тўлайди — бу ерда ёмон нарса йўқ", деб ёзди бир фойдаланувчи.
Яна бири, "Бизнинг машҳур бағрикенглигимиз қаерга йўқолди? Оддий бизнесга нисбатан нега бундай шовқин?" дея фикр билдирди.
Баъзи изоҳлар ҳижоб мавзусини бошқа давлатларда аёлларга нисбатан босим масалалари билан боғлашди. "Ҳижоб ҳар доим ҳам ихтиёрий танлов эмас.
Эрон каби давлатларда ҳижоб туфайли қизларни ўлдиришган. Норозилик билдираётганларни тушунаман", деб ёзди бир фойдаланувчи.
Шу билан бирга, кўплаб фойдаланувчилар Беларусда яшовчи мусулмонларга нафрат билан муносабатда бўлишни қораладилар. Кутилмаганда, Қозоғистонлик фойдаланувчилар ҳам муҳокамаларга фаол қўшилишди.
Улар Қозоғистонда белорус маҳсулотлари ва дўконлари кўплигини эслаб ўтишди: "Бизнинг ҳар бир савдо марказимизда белорус маҳсулотлари сотилади — ва ҳеч ким бу маданиятни зўрлаб сингдириш деб бақирмайди."
Бу эса "бағрикенглик", "миллий ғурур" ва "бегона урф-одатлар" каби мавзуларда қизғин баҳс-мунозараларга олиб келди. Натижада, муҳокамалар дўкон мавзусидан чиқиб, кенгроқ масалаларга чўзилди.
"Мен янги обуначиларни, яъни Беларусь мусулмон аёлларини жалб қилиш қийин бўлади деб ўйлагандим. Дам олиш кунлари рилслар учун сценарийлар ёздим, қаерда суратга олишни ва ёруғликни қандай қўйишни ўйлаб чиқдим.
Аммо ҳаммаси осонроқ экан: Threads’да бир неча сонияда пост ёздим — ва… Раҳбарим: ‘Жасмин, энди сен Минскда машҳур бўлдинг’, деди", — дея хулоса қилди пост муаллифи.
Меҳмон гуруҳидаги фойдаланувчилар ушбу мақолага изоҳ қолдира олмайди.
