2025 yil 29 noyabr kuni Threads platformasida hijoblarga oid mavzu katta bahs-munozaralarga sabab bo‘ldi. Bu holat Jasmin Taxa ismli foydalanuvchi tomonidan Odessadan Minskka ko‘chib o‘tib, musulmon ayollar uchun bosh kiyimlar do‘koni ochmoqchi ekanini e’lon qilganidan so‘ng yuzaga keldi.
Ushbu post qisqa vaqt ichida virusli bo‘lib, unga 1,6 mingdan ortiq foydalanuvchi munosabat bildirdi, 3,4 mingdan ziyod izoh va deyarli 1 ming qayta ulashuv yig‘di. Post muallifi hijobda tushgan suratini joylab, Belarusda musulmon ayollar uchun kiyim-kechak brendi yaratishni rejalashtirayotganini ma’lum qildi.
Oddiy biznes tashabbusi sifatida ko‘rilishi kerak bo‘lgan bu e’lon Belarus va Qozog‘iston foydalanuvchilari o‘rtasida qizg‘in bahslarga sabab bo‘ldi. Ba’zi beloruslik foydalanuvchilar bu yangilikni og‘ir qabul qilishdi.
Ularning fikricha, musulmon kiyimlari do‘koni ochilishi "milliy madaniyatga tahdid" bo‘lishi mumkin. Ayrimlar esa musulmon davlatlarda xristian atributlari bilan bog‘liq do‘konlar ochilishi agressiyaga sabab bo‘lishini ta’kidladilar.
Shu bilan birga, hijobga qarshi nafratga nisbatan norozilik bildirganlar ham ko‘plab uchradi. "Hijob sotilishi musulmonlarning migratsiyasiga olib kelmaydi va xristian ayollarni Islom diniga o‘tkazmaydi.
Bu oddiy kiyim. Qiz soliq to‘laydi — bu yerda yomon narsa yo‘q", deb yozdi bir foydalanuvchi.
Yana biri, "Bizning mashhur bag‘rikengligimiz qayerga yo‘qoldi? Oddiy biznesga nisbatan nega bunday shovqin?" deya fikr bildirdi.
Ba’zi izohlar hijob mavzusini boshqa davlatlarda ayollarga nisbatan bosim masalalari bilan bog‘lashdi. "Hijob har doim ham ixtiyoriy tanlov emas.
Eron kabi davlatlarda hijob tufayli qizlarni o‘ldirishgan. Norozilik bildirayotganlarni tushunaman", deb yozdi bir foydalanuvchi.
Shu bilan birga, ko‘plab foydalanuvchilar Belarusda yashovchi musulmonlarga nafrat bilan munosabatda bo‘lishni qoraladilar. Kutilmaganda, Qozog‘istonlik foydalanuvchilar ham muhokamalarga faol qo‘shilishdi.
Ular Qozog‘istonda belorus mahsulotlari va do‘konlari ko‘pligini eslab o‘tishdi: "Bizning har bir savdo markazimizda belorus mahsulotlari sotiladi — va hech kim bu madaniyatni zo‘rlab singdirish deb baqirmaydi."
Bu esa "bag‘rikenglik", "milliy g‘urur" va "begona urf-odatlar" kabi mavzularda qizg‘in bahs-munozaralarga olib keldi. Natijada, muhokamalar do‘kon mavzusidan chiqib, kengroq masalalarga cho‘zildi.
"Men yangi obunachilarni, ya’ni Belarus musulmon ayollarini jalb qilish qiyin bo‘ladi deb o‘ylagandim. Dam olish kunlari rilslar uchun ssenariylar yozdim, qayerda suratga olishni va yorug‘likni qanday qo‘yishni o‘ylab chiqdim.
Ammo hammasi osonroq ekan: Threads’da bir necha soniyada post yozdim — va… Rahbarim: ‘Jasmin, endi sen Minskda mashhur bo‘lding’, dedi", — deya xulosa qildi post muallifi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
