Италия А Сериясининг 34-турини якунлаб берган баҳс ҳақиқий драматик сценарий асосида кечди. Римдаги «Олимпико» стадионида «Лацио» ва «Удинезе» ўртасидаги учрашув голларга бой ўтиб, 3:3 ҳисобида дуранг билан якунланди.
Ўйиннинг илк дақиқалариданоқ меҳмонлар ташаббусни қўлга олди. 18-дақиқада Эҳизибуэ ҳисобни очди ва «Удинезе»ни олдинга олиб чиқди. Иккинчи бўлимда «Лацио» жавоб қайтарди — 50-дақиқада Пеллегрини ҳисобни тенглаштирди.
Шундан кейин ўйин очиқ ва ҳужумкор руҳда давом этди. 80-дақиқада Педро мезбонларни олдинга олиб чиқди. Аммо «Удинезе» таслим бўлмади: Атта 86-дақиқада ҳисобни тенглаштирди, 90+3-дақиқада эса яна гол уриб, жамоасини ғалабага яқинлаштирди.
Бироқ драманинг энг юқори нуқтаси ҳали олдинда эди. 90+5-дақиқада захирадан тушган Малдини аниқ зарба билан «Лацио»ни мағлубиятдан қутқариб қолди ва учрашувдаги якуний нуқтани қўйди.
А Серия. 34-тур
Лацио — Удинезе 3:3
28 апрел, «Олимпико»
Голлар: Пеллегрини (50), Педро (80), Малдини (90+5) — Эҳизибуэ (18), Атта (86, 90+3).
Лацио — Мотта, Лаззари, Романиоли, Провстгаард, Пеллегрини (Тавареш, 84), Башич, Патрик, Тэйлор (Деле-Баширу, 61), Канчелери (Исаксен, 65), Диа (Педро, 61), Нослин (Малдини, 76).
Удинезе — Окойе, Кристенсен, Кабаселе (Заррага, 82), Соле, Эҳизибуэ (Байо, 82), Петровский (Миллер, 65), Атта, Камара (Аризала, 82), Заниоло, Эккеленкамп (Букса, 69), Гуйе.
Огоҳлантиришлар: Канчелери (41), Пеллегрини (57), Заррага (90), Патрик (90+7).
Ушбу натижадан сўнг Сарри жамоаси очколарини 48 тага етказиб, турнир жадвалида 8-поғонага кўтарилди. «Удинезе» эса 44 очко билан 11-ўринда қолмоқда.
Қисқача айтганда, бу ўйин — эмоция, интрига ва камбэкнинг тўлиқ пакети бўлди. Футбол шундай бўлса керак.
Read “Zamin” on Telegram!
