Калифорния штатындағы Сан-Габриэль тауларында орын алған ауыр жол-көлік оқиғасы бүкіл әлемдегі геймерлер мен IT-қоғамдастықты дүр сілкіндірді. Әлемге әйгілі бейнеойын жасаушысы, индустрияда үлкен із қалдырған Винс Зампелла 55 жасында өмірден өтті.
NBC4 телеарнасының мәліметіне сүйенсек, Зампеллаға тиесілі Ferrari автокөлігі туннельден шыққан тұста басқаруынан айырылып, бетон қоршауға соғылған. Күшті соққыдан кейін көлік өртке оранған. Оқиға орнында Винс Зампелла қаза тапқан, ал көлік ішінде болған жолаушы ауыр жарақаттармен ауруханаға жеткізілгенмен, оның да өмірін сақтап қалу мүмкін болмаған.
Винс Зампелланың бейнеойындар тарихындағы орны ерекше. Ол Infinity Ward студиясының негізін қалаушылардың бірі болған және дәл осы команда арқылы аңызға айналған Call of Duty сериясы жасалған. Бұл жоба жылдар бойы миллиондаған жанкүйерлерді өзіне баурап, жанрдың дамуына үлкен серпін берді.
Кейінірек Зампелла өз жолын жалғастырып, Respawn Entertainment компаниясын құрған. Мұнда ол Titanfall және Apex Legends сияқты танымал ойындар арқылы тағы бір мәрте өзінің шеберлігін дәлелдеді. Соңғы жылдары Зампелла Electronic Arts құрамында жұмыс істеп, Battlefield сериясын дамытуға жетекшілік еткен.
Electronic Arts компаниясы Зампелланың қазасын ресми растады және оны бейнеойындар әлемін түбегейлі өзгерткен, шабыт беруші визионер ретінде сипаттады. Компания мәлімдемесінде: “Бұл орны толмас қаза. Жүрегіміз Винстің отбасы, жақындары және оның істерінен шабыт алған барлық адамдармен бірге”, — деп жазылған.
Қазіргі уақытта полиция оқиға себептерін зерттеуде. Тергеушілер көліктің таулы жолда не себепті басқарудан айырылғанын, техникалық ақау немесе басқа да факторлардың бар-жоғын анықтауға тырысуда.
Сөзсіз, Винс Зампелланың есімі бейнеойындар тарихында мәңгі қалады. Оның жасаған жобалары әлі де көп жылдар бойы миллиондаған адамдарға қуаныш сыйлай бермек.
“Zamin”-ді Telegram-нан оқыңыз!
«Меҳмон» тобындағы келушілер бұл жарияланымға пікір қалдыра алмайды.
