24 ақпан күні Шавкат Мирзиёевтің жетекшілігімен өткен жиында күтпеген, бірақ жағымды сәт байқалды. Жиынға қатысқан 4-сынып оқушысы ән айтып бергеннен кейін, оған автомобиль сыйға берілетіні айтылды. Бұл туралы журналист Азиза Қурбонова мәлімдеді.
Белгілі болғандай, Отамурод есімді бала Комилжон Отаниёзовтың әнін орындайтынын айтқан. Президент болса әзіл аралас түрде “Отажон Худойшукуров репертуарынан да болсын”, деп күлдірген. Осы әңгімеден кейін мемлекет басшысы оқушыға машина сыйға берілетінін айтқан.
Жиында негізгі тақырып жастардың жұмыспен қамтылуы болды. Айтылуынша, жыл сайын 600 мың жас еңбек нарығына кіріп келеді, 2030 жылға қарай бұл көрсеткіш 1 миллионға жетуі мүмкін. Президент жастардың өзін табуы, өзіне лайық жұмысқа орналасуы үшін жағдай жасау ең өзекті мәселе екенін атап өтті.
Сондай-ақ, жастар арасында жүргізілген сауалнама нәтижесіне қарай, олардың үштен бірі кәсіпкер болғысы келетінін білдірген. Өткен жылы жастардың жұмыспен қамтылуын қамтамасыз ету үшін банктер мен Жастар істері агенттігіне 400 миллион доллар бөлінген. Атап айтқанда, “Жастар бизнесі”, “Келажакка қадам” бағдарламалары есебінен 15 мың жас өз кәсіпкерлігін жолға қойған, нәтижесінде 50 мың адам жұмыспен қамтылғаны айтылды.
Жиында тағы бір маңызды жаңалық та жарияланды: жастар кәсіпкерлігін қолдап-қуаттау үшін қосымша 200 миллион доллар бөлінеді. Бұдан бөлек, жас кәсіпкерлердің жобалары үшін 10 миллиард сомға дейін несие бөлу (қазір 5 миллиард сомға дейін) жоспарланып отырғаны, инновациялық стартап жобаларына 100 мың долларға дейін инвестиция салуға рұқсат берілетіні де мәлім етілді.
Қысқасы, жиында да сандар да, шешімдер де көп болды. Бірақ көпшіліктің жадында қалғаны — ән айтқан баланың жүрегіне қуаныш сыйлаған сол сыйлық болды.
