Си Жинпин Яқин Шарқдаги урушни тезроқ тугатиш зарурлигини айтди
Хитой раиси Си Жинпин Пекинда Россия президенти Владимир Путин билан ўтказилган музокараларда Яқин Шарқдаги урушни имкон қадар тезроқ тўхтатиш зарурлигини айтди.
Си Жинпиннинг таъкидлашича, ҳарбий ҳаракатларнинг якунланиши дунёда энергия ресурслари таъминоти ва халқаро савдо барқарорлигига таҳдидни камайтиради. У тинчликка эришишда музокаралар муҳим ўрин тутишини қайд этди.
Аввалроқ Хитой етакчиси Пекинда АҚШ президенти Доналд Трампни ҳам қабул қилган эди. Вашингтон Теҳрондан ядровий дастурдан воз кечишни талаб қилиб, Эронга қарши ҳарбий ҳаракатларни бошлаган.
Эронни АҚШ шартларига кўндиришга уринишлар ҳозирча натижа бермагани айтилмоқда. Ҳўрмуз бўғозидаги блокада эса нефть ва суюлтирилган газ экспортига жиддий таъсир қилиб, глобал энергетик инқироз хавфини кучайтирди.
Шу фонда Россия нефти ва газига нисбатан айрим АҚШ санкциялари юмшатилгани қайд этилмоқда. Путиннинг Пекинга ташрифида Хитойга Россия энергия ресурсларини етказиб бериш ҳажмини ошириш асосий мавзулардан бири бўлиши кутилмоқда.
