Денгизни бўлишга уринган руҳоний чўкиб кетишга сал қолди

Африкада юз берган ноодатий воқеа ижтимоий тармоқларда катта муҳокамаларга сабаб бўлди. Тарқалган видеоларда бир руҳоний ўзини “мўъжиза кўрсата олашини” эълон қилиб, одамлар кўз ўнгида денгизни бўлишга урингани акс этган.

Маълумотларга кўра, у Муқаддас китобларда тасвирланган Мусо пайғамбар мўъжизасига ўхшаш ҳолатни такрорлашга ҳаракат қилган ва сув оқимига кириб, денгизни икки қисмга ажратмоқчи бўлган.

Бироқ унинг бу ҳаракати кутилган натижа бермаган. Кучли сув оқими уни ўзига тортиб кетган ва руҳоний чўкиб кетишига бир баҳя қолган. Руҳоний тезкорлик билан орқага қайтиб, вазият янада оғирлашиб кетишининг олдини олган.

Мазкур ҳолат тасвирланган видео интернетда тез тарқалиб, фойдаланувчилар орасида турли мунозараларга сабаб бўлмоқда. Кўпчилик бундай ҳаракатлар хавфли эканини таъкидлаб, диний мўъжизаларни нотўғри талқин қилиш оқибатлари жиддий бўлиши мумкинлигини ёзмоқда.