КамАЗ янги ФОРА "Тунги қувватлаш" станциясини тақдим этди
КамАЗ ва КРEТ компаниялари электробуслар учун шаҳар транспорти тизимини тубдан ўзгартириши кутилаётган янги ФОРА "Тунги қувватлаш" станциясини намойиш этди. ФОРА ЭЗС-ДК-4М деб номланган ушбу қурилма 160 кВ қувватга эга бўлиб, махсус тунги вақтда техникаларни қувватлантириш учун мўлжалланган. Бу ҳақда Ixbt.com хабар беради.
Лойиҳа доирасида электробусларнинг қувватини тўлиқ тиклаш учун тахминан 2,5 соат вақт сарфланади. Мазкур ечим анъанавий ультра-тезкор қувватлаш мажмуаларидан сезиларли даражада арзонроқ эканлиги билан ажралиб туради. Лойиҳанинг асосий ғояси — электр энергияси тарифлари минимал бўлган тунги вақтда транспортларни қувватлашдир.
Бунинг шарофатида ташувчилар харажатларни камайтириши ва транспорт самарадорлигини ошириши мумкин бўлади. Эндиликда электробуслар кундузи қувватлаш терминаллари ёнида узоқ вақт тўхтаб туришига ҳожат қолмайди. Янги станция 0 дан 750 В гача кучланишда ишлайди ва 250 А гача ток кучини қўллаб-қувватлайди.
Ишлаб чиқувчилар қурилмада бир неча даражали ҳимоя тизимларини, жумладан, ортиқча юкланиш, қисқа туташув ва кучланиш ўзгаришларидан ҳимоялашни кўзда тутган. Ускуна -30 дан +45 °К гача бўлган ҳароратда ишлашга мўлжалланган бўлиб, намлик ва чангдан қўрқмайди. Авторизация учун РФИД-карта ёки махсус мобил иловадан фойдаланиш мумкин.
