Google муҳандиси Полймаркет орқали 1,2 млн доллар ишлаб топгани учун айбланди

АҚШ Адлия вазирлиги Google компаниясининг дастурий таъминот муҳандиси Мичеле Спагнуолони инсайдерлик савдосида айблади. Маълумотларга кўра, ходим компаниянинг махфий маълумотларидан фойдаланиб, Полймаркет башоратлар платформасида 1,2 миллион доллар фойда кўрган. Бу ҳақда Techcrunch.com хабар беради.

LinkedIn маълумотларига кўра, Спагнуоло Google компаниясида 12 йилдан ортиқ вақт давомида фаолият юритган ва Полймаркет платформасида “АлпҳаРаккоон” тахаллуси остида савдо қилган. Нью-Йорк жанубий округи прокурори Жай Клайтоннинг таъкидлашича, Спагнуоло ўз иш берувчиси олдидаги мажбуриятларини бузган ҳолда, ноқонуний бойлик орттириш мақсадида ички маълумотлардан фойдаланган.

Айблов хулосасига кўра, муҳандис Google'нинг “2025 Еар ин Сеарч” маркетинг кампанияси билан боғлиқ гаровларга 2,7 миллион доллардан ортиқ маблағ тиккан. У Google Search тизимидаги энг кўп қидирилган машҳурлар ҳақидаги махфий маълумотларни қўлга киритиб, ушбу маълумотлар асосида ютуқли гаровларни амалга оширган.

Полймаркет вакилининг TechCrunch нашрига маълум қилишича, блокчейн технологияси шаффоф ва кузатилувчан бўлгани сабабли, қонунбузарлар ўзидан из қолдиради. Платформа ушбу иш бўйича ҳуқуқ-тартибот идоралари билан яқиндан ҳамкорлик қилганини билдирди.

Google компанияси ҳам мазкур ҳолат юзасидан баёнот бериб, ходим барча ишчилар учун очиқ бўлган маркетинг воситаларидан фойдаланганини, бироқ махфий маълумотлардан гаров тикиш мақсадида фойдаланиш компания сиёсатига зид эканини таъкидлади. Ҳозирда муҳандис ишдан четлатилган ва унга нисбатан тегишли чоралар кўрилмоқда.