Камбағал оилалар тадбиркорлик учун молиявий ёрдам олади

Ўзбекистонда камбағал оилаларга тадбиркорлик билан шуғулланишлари учун фоизсиз ссудалар ажратилади. Бу Президентнинг 14-феврал куни қабул қилинган “Аҳолини тадбиркорликка жалб қилиш ва бандлигини таъминлаш учун молиявий ёрдамлар ажратиш тизимини такомиллаштиришга оид қўшимча чора-тадбирлар тўғрисида”ги қарорида белгиланган.

Қарорга кўра, Ижтимоий ҳимоя ягона реестри ва Камбағал оилалар реестрига киритилган оилалар аъзоларига тадбиркорлик фаолиятини бошлаш учун зарур бўлган асбоб-ускуналарни харид қилиш мақсадида фоизсиз ссуда ажратиш тизими жорий этилади. Шу билан бирга, аҳолининг қизиқиш билдирмаган, фойдаланилмаётган ва самарадорлиги паст субсидиялари бекор қилиниб, бир-бирини такрорловчи субсидиялар бирлаштирилади.

Маҳаллаларнинг ихтисослашуви ва драйвер йўналишларидан келиб чиқиб, камбағал оилаларга тадбиркорлик ҳамда деҳқончилик билан шуғулланиши учун грант ва фоизсиз ссудалар ажратилади.

2026-йил 1-январдан аҳолига нақд пул шаклида бериладиган молиявий ёрдамлар босқичма-босқич ижтимоий карта орқали ажратилади.

Бундан ташқари, 2025-йил 20-мартгача Иқтисодиёт ва молия вазирлиги марказий аппарати тузилмаси доирасида Субсидия, ссуда ва грантларнинг самарадорлигини баҳолаш ва мувофиқлаштириш бошқармаси ташкил этилади.