MicroStrategy kompaniyasi ijrochi raisi Michael Saylor kompaniya Bitcoin aktivlarini sotish imkoniyatini koʻrib chiqayotgani haqidagi xabarlarga oydinlik kiritdi. Uning soʻzlariga koʻra, bu qadam aktivning uzoq muddatli manfaatlarini himoya qilish va bozor likvidligidan samarali foydalanish maqsadida amalga oshirilishi mumkin. Bu haqda Cointelegraph.com xabar beradi.
Saylor "The Wolf Of All Streets" podkastida bergan intervyusida, agar kompaniya oʻz Bitcoin zaxiralarini hech qachon sotmasligini eʼlon qilsa, kredit reyting agentliklari buni aktiv sifatida tan olmay qoʻyishi mumkinligini taʼkidladi. Uning fikricha, bozor likvidligidan foydalanmaslik aktivning qiymatini pasaytiradi, chunki kompaniya biznes modelining 98 foizi aynan shu aktivga asoslangan.
Ushbu bayonot kripto hamjamiyatida qizgʻin muhokamalarga sabab boʻldi, chunki bu MicroStrategy kompaniyasining uzoq yillik "hech qachon sotmaslik" strategiyasiga zid keladi. Biroq, Saylor buni bozor ishonchini mustahkamlash va kutilmagan moliyaviy tebranishlarga qarshi "emlash" chorasi sifatida izohladi.
Hozirgi kunda MicroStrategy 818 869 BTC miqdoridagi yirik zaxiraga ega boʻlib, kompaniya 2020-yil avgustidan buyon Bitcoin sotib olishda davom etmoqda. Garchi baʼzi tahlilchilar kompaniya moliyaviy majburiyatlar tufayli aktivlarini sotishga majbur boʻlishi mumkinligini taxmin qilsa-da, Saylor "sotganingizdan koʻra koʻproq Bitcoin sotib oling" tamoyiliga amal qilishini taʼkidlamoqda.
“Zamin”ni Telegramʻda oʻqing!
