Italiyaning eng yirik moliya muassasasi Intesa Sanpaolo 2026-yilning birinchi choragida o‘zining kriptoaktivlar portfelini ikki barobardan ko‘proqqa oshirdi. Bankdagi kriptoaktivlar qiymati 2025-yil yakunidagi 100 million dollardan joriy yilning 31-mart holatiga ko‘ra 235 million dollargacha ko‘tarildi. Bu haqda Cointelegraph.com xabar beradi.
O‘sish asosan Bitcoin pozitsiyalarining kengayishi hisobiga yuz berdi. Bank ARK 21Shares BTC ETF va BlackRock kompaniyasining iShares Bitcoin Trust ETF fondlariga investitsiyalarini oshirdi. Shuningdek, ilk bor Ethereum bozoriga kirib, BlackRock’ning iShares Staked Ethereum Trust fondini sotib oldi va Grayscale XRP Trust ETF orqali 26 million dollarlik XRP ulushini qo‘lga kiritdi.
Intesa Sanpaolo o‘z strategiyasini o‘zgartirib, Solana aktivlarini sezilarli darajada qisqartirdi va Bitwise Solana Staking ETF fondidagi ulushini deyarli to‘liq sotdi. Shu bilan birga, bank Coinbase aksiyalarini 1 500 donadan 10 357 donagacha ko‘paytirdi va BitGo kompaniyasining 165 600 ta aksiyasini ilk bor portfeliga qo‘shdi.
Ushbu harakatlar bankning raqamli aktivlar sektoridagi aloqalari mustahkamlanayotganidan dalolat beradi. O‘tgan oyda Ripple kompaniyasi Intesa Sanpaolo bank guruhiga o‘zining saqlash (custody) xizmatlarini taqdim etishini e’lon qilgan edi. Bank rahbariyati ushbu kriptoaktivlar asosan xususiy savdo maqsadlarida ushlab turilganini ma’lum qildi.
Yevropaning boshqa yirik banklari ham kripto bozoriga faol kirib kelmoqda. Jumladan, Ispaniyaning BBVA, Fransiyaning BPCE va Belgiyaning KBC banklari mijozlarga kriptovalyuta savdosi xizmatlarini taklif qilmoqda. Shuningdek, BNP Paribas va Deutsche Bank kabi yirik moliya institutlari MiCA qoidalariga mos keladigan yevro bilan ta’minlangan steyblkoin loyihasi ustida ishlamoqda.
“Zamin”ni Telegramʻda oʻqing!
