Buyuk Britaniya hukumati Rossiyani qoʻllab-quvvatlagani sababli HTX (sobiq Huobi Global) kriptovalyuta birjasini sanksiyalar roʻyxatiga kiritdi. Britaniya rasmiylarining ta’kidlashicha, ushbu platforma sanksiya ostidagi A7 Limited Liability Company va Garantex kabi tuzilmalar orqali Rossiya hukumatiga moliyaviy xizmatlar koʻrsatgan deb gumon qilish uchun yetarli asoslar mavjud. Bu haqda Cointelegraph.com xabar beradi.
Panamada joylashgan ushbu birja Rossiyaning Britaniya sanksiyalarini chetlab oʻtishga urinishlariga qarshi kurash doirasida qora roʻyxatga tushgan navbatdagi sub’ekt boʻldi. Buyuk Britaniya Tashqi ishlar vaziri Yvette Cooperning soʻzlariga koʻra, Kreml kripto tarmoqlar va yashirin moliyaviy tizimlar ortiga yashirinib, cheklovlardan qochib qutula olmaydi.
Rossiya 2022-yilda Ukrainada boshlagan harbiy harakatlari tufayli Yevropa Ittifoqi va jahon hamjamiyati tomonidan doimiy bosim ostida qolmoqda. Shu yilning aprel oyida Yevropa Komissiyasi Belarus bilan bogʻliq raqamli aktiv operatorlari va stablecoinlarga qarshi yangi sanksiyalar paketini e’lon qilgan edi.
HTX avvalroq Buyuk Britaniyaning Financial Conduct Authority (FCA) nazorat organi e’tiboriga tushgan edi. 2025-yilda kompaniyaga nisbatan TikTok, X, Facebook va Instagram kabi ijtimoiy tarmoqlarda kriptovalyutalarni noqonuniy reklama qilgani uchun huquqiy choralar koʻrilgan. Britaniya regulyatori birjani marketing qoidalarini qoʻpol ravishda buzganlikda ayblagan.
Shu bilan birga, Rossiya qonun chiqaruvchilari litsenziyasiz raqamli aktiv xizmatlari uchun jinoiy javobgarlikni belgilovchi choralarni koʻrib chiqmoqda. Yangi qonun loyihalari chakana investorlar uchun kripto operatsiyalarini cheklash va raqamli aktivlar bilan toʻlovlarni amalga oshirishni taqiqlashni koʻzda tutadi.
“Zamin”ni Telegramʻda oʻqing!
