Xitoy Oliy xalq sudi (SPC) raqamli iqtisodiyot bilan bogʻliq nizolarni hal qilish mexanizmlarini aniqlashtirish maqsadida virtual valyutalar va transchegaraviy moliya ishlari boʻyicha yangi sud qoidalarini oʻrganishini maʼlum qildi. Sud vakili Liu Guixiangning soʻzlariga koʻra, tez orada insayd savdosi va bozor manipulyatsiyasi bilan bogʻliq fuqarolik kompensatsiyalari boʻyicha huquqiy talqinlar ishlab chiqiladi. Bu haqda Cointelegraph.com xabar beradi.
Shuningdek, sud sunʼiy intellekt (AI) va maʼlumotlarga boʻlgan mulk huquqi, jumladan, AI tomonidan yaratilgan kontent va maʼlumotlar tranzaksiyalari boʻyicha sud himoyasi qoidalarini oʻrganishni rejalashtirmoqda. Ushbu tashabbus kripto va AI sohasidagi intellektual mulk huquqlariga oid daʼvolarda sudlar qanday qaror qabul qilishi va javobgarlikni belgilashi boʻyicha aniq ichki standartlarni yaratishga qaratilgan.
Ushbu yangilik Xitoyda kriptovalyuta sanoatiga nisbatan munosabat murakkab boʻlib qolayotgan bir paytda eʼlon qilindi. Eslatib oʻtamiz, 2013-yilda Xitoy Xalq banki (PBOC) moliyaviy muassasalarga Bitcoin bilan bogʻliq xizmatlarni taqiqlagan edi. 2021-yil sentyabr oyida esa mamlakatda barcha kripto tranzaksiyalari va mayning faoliyati butunlay man etilgan.
Yangi koʻrsatmalar mamlakatda koʻpayib borayotgan kripto va AI bilan bogʻliq sud ishlarida izchillikni taʼminlashi kutilmoqda. Bu choralar, ayniqsa, yaqinda yuz bergan yirik firibgarlik ishlari va AQSH Adliya vazirligi tomonidan Chen Zhi ishi doirasida 15 milliard dollarlik Bitcoin musodara qilinganidan soʻng yanada dolzarb ahamiyat kasb etmoqda.
“Zamin”ni Telegramʻda oʻqing!
