Gollivud yulduzlari Rayan Reynolds va Rob Makelxenni boshqaruvidagi Wrexham klubining misli koʻrilmagan yuksalishi butun dunyo eʼtiborini tortmoqda. Endilikda ushbu jamoa futbol tarixidagi eng yirik ikonalar bilan shartnoma imzolashi mumkinligi haqida taxminlar paydo boʻldi. Angliya Premer-ligasining sobiq murabbiyi Toni Pulisning fikricha, Shimoliy Uels klubi Lionel Messi, Cristiano Ronaldo yoki Neymar kabi yulduzlarni oʻz safiga jalb qilish uchun oʻziga xos jozibaga ega. Bu haqda Goal.com xabar beradi.
2021-yil fevral oyida amalga oshirilgan shov-shuvli xariddan soʻng, Wrexham quyi ligadagi oddiy jamoadan global fenomenga aylandi. Maydondagi natijalar ham tijoriy oʻsish kabi tezkor boʻldi — Fil Parkinson boshchiligidagi jamoa ketma-ket uch marta yuqori ligalarga koʻtarilishga muvaffaq boʻldi. Oʻtgan mavsumda jamoa Chempionshipda yettinchi oʻrinni egallab, pley-off bosqichidan atigi ikki ochko masofada toʻxtadi.
Klub Angliya Premer-ligasiga chiqishni maqsad qilar ekan, uning safiga qaysi jahon darajasidagi yulduzlar kelishi borasidagi muhokamalar qizgʻin tus olmoqda. Koʻp karra "Oltin toʻp" sohiblarini taklif qilish boshqa klublar uchun xayol boʻlib tuyulsa-da, Pulis Wrexham oʻz ambitsiyalariga chegara qoʻymasligi kerakligini taʼkidlamoqda. Uelslik mutaxassis egalarining xarizmasi va klubning nufuzi har qanday transferni amalga oshirishga imkon beradi deb hisoblaydi.
Toni Pulis BOYLE Sports nashriga bergan intervyusida shunday dedi: "Wrexhamning navbatdagi yirik transferi? Cristiano Ronaldo, Lionel Messi yoki Neymar — nima uchun yoʻq? Uels, ayniqsa Shimoliy Uels juda goʻzal joy. Garchi bu yulduzlar hozirda AQSH, Saudiya Arabistoni va Braziliyada toʻp surayotgan boʻlsa-da, Uels mehmondoʻstligi ularni oʻziga jalb qilishi mumkin".
Pulisning hazilomuz ohangda qoʻshimcha qilishicha, moliyaviy imkoniyatlardan tashqari, hududning tabiati va odamlarning samimiyligi asosiy omil boʻladi: "Ularga bu yerda quyosh hech qachon botmasligini va taomlar ajoyibligini ayting. Hatto havo yomgʻirli boʻlsa ham, uelsliklardan koʻra samimiyroq odamlarni topib boʻlmaydi. Superyulduzlarni Wrexhamga olib kelish uchun aynan mana shu eng kuchli dalildir".
“Zamin”ni Telegramʻda oʻqing!
