American Airlines aviakompaniyasi kelasi yilning boshidan boshlab 500 dan ortiq Airbus samolyotlariga Starlink tizimini oʻrnatishni rejalashtirayotganini maʼlum qildi. Bu SpaceX boʻlinmasi uchun parvoz vaqtidagi Wi-Fi xizmatlarini koʻrsatish boʻyicha navbatdagi yirik kelishuv boʻldi. Bu haqda Techcrunch.com xabar beradi.
Ushbu shartnoma SpaceX tarkibidagi yagona daromad keltiruvchi boʻlinma hisoblangan Starlink uchun nafaqat moliyaviy foyda, balki Amazon Leo va Viasat kabi raqobatchilar ustidan muhim gʻalabani ham anglatadi. Starlink sunʼiy yoʻldoshlari past Yer orbitasidan foydalangan holda ham oddiy isteʼmolchilarga, ham yirik korporativ mijozlarga keng polosali internet yetkazib beradi.
Kompaniya soʻnggi vaqtlarda aviakompaniyalar va kruiz operatorlari bilan hamkorlikni sezilarli darajada kengaytirdi. SpaceX’ning oʻtgan haftada eʼlon qilingan IPO roʻyxatga olish hujjatlariga koʻra, United Airlines, Southwest Airlines, Qatar Airways, Lufthansa Group, British Airways va Alaska Airlines kabi tashuvchilar allaqachon oʻz samolyotlarini Starlink bilan jihozlashni boshlagan.
American Airlines bilan tuzilgan yangi kelishuvga koʻra, faqat Airbus A321XLR va A320neo rusumli yangi samolyotlar ushbu texnologiya bilan taʼminlanadi, Boeing samolyotlari esa hozircha ushbu loyihaga kiritilmagan. Bu SpaceX uchun kelasi oyda kutilayotgan va tarixda eng yirigi boʻlishi taxmin qilinayotgan IPO oldidan navbatdagi ijobiy turtki boʻldi.
“Zamin”ni Telegramʻda oʻqing!
