Soʻnggi yillarda Hindistonda onlayn oziq-ovqat yetkazib berish va uy xizmatlari bozori keskin oʻsdi. Zomato va Swiggy kabi gigantlar ommaviy savdolarga chiqqan boʻlsa, Urban Company va Pronto kabi platformalar kundalik yumushlar uchun ishchi kuchini raqamlashtirdi. Endilikda Silikon vodiysida asos solingan Human Archive startapi ushbu tendensiyadan foydalanib, robotlarni oʻrgatish uchun zarur boʻlgan birinchi shaxs (egotsentrik) koʻrinishidagi video maʼlumotlarni yigʻishni boshladi. Bu haqda Techcrunch.com xabar beradi.
Human Archive ishchilarga kameralar bilan jihozlangan maxsus kepkalar kiydirib, ularning kundalik vazifalarni bajarish jarayonini tasvirga oladi. Startap hozirda uy xizmatlari, xostellar va restoran sektorlaridagi kompaniyalar bilan hamkorlik qilib, 1000 dan ortiq faol qurilmalarni ishga tushirgan. Ushbu loyiha doirasida kompaniya Wing Venture Capital, NVP Capital, Y Combinator hamda OpenAI, NVIDIA, Google va Meta kabi texnologik gigantlarning farishta investorlaridan 8,2 million dollar investitsiya jalb qildi.
Kompaniyaga Berklidagi Kaliforniya universiteti va Stanford universiteti talabalari — Samay Mani, Rushil Agarwal, Shloke Patel va Raj Patel tomonidan asos solingan. Ularning barchasi robototexnika, apparat vositalari va taktil maʼlumotlar sohasida ilmiy tajribaga ega. Startapning asosiy maqsadi — sunʼiy intellekt laboratoriyalari va robototexnika kompaniyalari duch kelayotgan asosiy muammo, yaʼni real dunyodagi jismoniy harakatlarni aks ettiruvchi yuqori sifatli maʼlumotlar tanqisligini bartaraf etishdir.
Biroq, barcha kompaniyalar ham bu gʻoyani ijobiy kutib olmadi. Masalan, Urban Company va Pronto kabi yirik platformalar Human Archive bilan hamkorlikni rad etishgan. Urban Company rahbari Abhiraj Singh Bhal bunday kelishuvlarga kirmasligini maʼlum qilgan boʻlsa, Human Archive asoschilari bu qarorni kelajakda mijozlarni yoʻqotishga olib kelishi mumkin boʻlgan xato deb atashdi. Shunga qaramay, Hindistonning rivojlanayotgan gig-iqtisodiyoti robotlar uchun eng yirik "oʻquv poligoni" boʻlib qolmoqda.
Human Archive faqat video bilan cheklanib qolmoqchi emas. Ular harakatlar va teginish kuchini (tactile force) aniq qayd etuvchi maxsus qoʻlqoplar, butun tana harakatini tutuvchi kostyumlar va bilak kameralarini ishlab chiqmoqda. Kompaniya fikricha, video maʼlumotlarni sensorli datchiklar bilan birlashtirish robotlarni yanada aniqroq va samaraliroq oʻrgatish imkonini beradi.
“Zamin”ni Telegramʻda oʻqing!
