Niderlandiya hukumati Amerikaning IT-giganti Kyndryl kompaniyasiga mamlakatning bulutli xizmatlar provayderi Solvinity’ni sotib olishni taqiqlab qoʻydi. Gaaga maʼmuriyati ushbu kelishuvni "jamoat manfaatlariga xavf tugʻdirishi mumkin" deb baholadi. Bu haqda Techcrunch.com xabar beradi.
Raqamli iqtisodiyot vaziri Willemijn Aerdts tomonidan eʼlon qilingan rasmiy xatda aytilishicha, hukumat ushbu xaridga nisbatan "toʻliq taqiq" joriy etgan. Solvinity kompaniyasi Niderlandiya fuqarolari davlat xizmatlaridan foydalanishda oʻz shaxsini tasdiqlash uchun qoʻllaydigan DigiD platformasiga xizmat koʻrsatadi.
Ushbu kelishuv DigiD maʼlumotlarining xorijiy nazorat ostiga oʻtib ketishi va AQSH rasmiylari tomonidan talab qilinishi mumkinligi borasidagi xavotirlarni keltirib chiqardi. AQSH qonunchiligi huquq-tartibot idoralari va razvedka xizmatlariga Amerika kompaniyalaridan xorijiy maʼlumotlar markazlarida saqlanayotgan maʼlumotlarni taqdim etishni talab qilish huquqini beradi.
Hukumat qarori Yevropa davlatlari AQSH texnologik gigantlariga qaramlikni kamaytirishga intilayotgan bir paytda qabul qilindi. Kyndryl vakillari ushbu qarordan "nihoyatda hafsalasi pir boʻlganini" maʼlum qildi. Hozircha kelishuvning moliyaviy tafsilotlari ochiqlanmagan.
“Zamin”ni Telegramʻda oʻqing!
