Spotify platformasi oʻzining audio olamidagi mavqeini mustahkamlash maqsadida yangi funksiyani ishga tushirdi. Endilikda foydalanuvchilar ilova orqali nufuzli jurnallarning uzun maqolalarini audio formatda tinglashlari mumkin boʻladi. Ushbu yangilik Premium obunachilar uchun har oylik 15 soatlik audio kitob tinglash limiti doirasida taqdim etiladi. Bu haqda Techcrunch.com xabar beradi.
Hozirgi vaqtda platformada Rolling Stone, The Atlantic, Vogue, Variety, Billboard va Wired kabi mashhur nashrlarning 650 dan ortiq maqolalari joylashtirilgan. Hozircha ushbu kontent faqat ingliz tilida mavjud boʻlib, bepul foydalanuvchilar har bir maqolani alohida 1,99 dollar evaziga sotib olishlari mumkin. Spotify vakillarining soʻzlariga koʻra, maqolalar ham inson ovozi, ham sunʼiy intellekt (digital voice) yordamida ovozlashtirilgan.
Kompaniya ushbu qadam orqali foydalanuvchilarni musiqa va podkastlardan tashqari, uzoq davom etadigan audio kontentlarga oʻrgatishni koʻzlamoqda. Bu esa kelajakda audio kitoblar segmentining daromadliligi oshishiga xizmat qiladi. Spotify Audiobooks litsenziyalash boʻlimi rahbari Colleen Prendergastning taʼkidlashicha, qisqa shakldagi kontentlar foydalanuvchilarda sogʻlom tinglash odatlarini shakllantirishga yordam beradi.
Soʻnggi haftalarda Spotify sunʼiy intellekt sohasida bir qator yangiliklarni eʼlon qildi. Bular qatoriga Google NotebookLM kabi AI-generatsiya qilingan podkastlar, mualliflar uchun audio kitob yaratish vositalari va AI-kaverlar kiradi. Yangi maqolalar funksiyasi ham platformaning umumiy audio ekotizimini boyitishga qaratilgan strategiyaning bir qismidir.
“Zamin”ni Telegramʻda oʻqing!
