Халқаро рейтинг агентлиги Moody's UzAuto Motors компаниясининг кредит рейтингини барқарор прогноз билан Ba3 даражасида тасдиқлади. Бу компаниянинг молиявий барқарор эканлиги ва қарзларни ўз вақтида тўлашга қодир эканлигини англатади.
UzAuto ўзининг амалдаги қарзларини қоплаш ва 2026 йил май ойида муддати тугайдиган 300 миллион долларлик еврооблигацияларини тўлаш мақсадида янги облигациялар чиқаришни режалаштирмоқда. Moody's ҳисобига кўра, бу компаниянинг молиявий ҳолатини мустаҳкамлашга ёрдам беради.
Ҳисоботда қайд этилишича, UzAuto Ўзбекистондаги энг йирик автомобиль ишлаб чиқарувчи компания бўлиб, унинг бозор улуши 82 фоизни ташкил этади. Ўтган йил давомида компания 378 мингта автомобиль ишлаб чиқарган, 4 миллиард доллар даромад олган ва 471 миллион доллар миқдорида фойда кўрган.
Компаниянинг 99,7 фоиз улуши давлатга тегишли. Moody's таъкидлашича, UzAuto учун баъзи хавфлар мавжуд, жумладан ички бозорга қарамлик ва General Motors билан ҳамкорлик.
Шунингдек, муддатли тўлов тизимига ўтиш сабабли савдо ҳажмининг вақтинчалик пасайиши кузатилган. Агентликнинг прогнозига кўра, яқин 1-2 йил ичида компания молиявий кўрсаткичларини яхшилаши ва барқарорликни мустаҳкамлаши мумкин.
Меҳмон гуруҳидаги фойдаланувчилар ушбу мақолага изоҳ қолдира олмайди.
