Экранда яратилган қаҳрамон ҳар доим ҳам фақат рол бўлиб қолавермайди. Айрим турк сериал актёрлари учун муваффақиятли образ шу қадар кучли таъсир кўрсатганки, у нафақат машҳурлик, балки мухлислар нафрати, таъқиб ва оғир руҳий босимни ҳам олиб келган. Баъзилар психотерапия ёрдамига муҳтож бўлган, айримлари эса ўз обрўси ва карьерасини нолдан қайта қуришга мажбур бўлган.
Керем Бурсин
Керем Бурсин учун ҳақиқий танилиш “Қуёшни кутиб” сериалидаги Керем роли билан бошланган эди. Аммо уни бутун дунёга машҳур қилган лойиҳа 2020 йилда чиққан “Қалбим эшигини қоқ” сериали бўлди. Ҳанде Эрчел билан тандем актёрга улкан шон-шуҳрат олиб келди, аммо бу муваффақият ортидан янги муаммолар ҳам келиб чиқди.
Серкан Болат образи шу қадар кучли таъсир қилдики, мухлислар Керем Бурсинни ундан ажрата олмай қолишди. Актёр қанчалик жиддий, драматик ролларга ўтишга уринмасин, томошабинлар уни доимо Эда Йилдизнинг севгилиси сифатида қабул қилди. Натижада “Серкан” исми умумий тушунчага айланиб, Керемнинг актёрлик диапазонини кенгайтириш уринишларини анча қийинлаштирди.
Мерем Узерли
Мерем Узерлининг ҳаёти “Муҳташам юз йил” сериали билан тубдан ўзгарди. Хуррам султон образи унга шиддатли машҳурлик олиб келди, аммо бу шуҳратга актриса руҳан тайёр эмас эди. Уч мавсум давомида улкан босим, тўхтовсиз иш ва оммавий эътибор унинг асаб тизимига қаттиқ таъсир қилди.
Актриса нафақат жисмонан, балки руҳан ҳам чарчади. Устакорона ижро этилган Хуррам образи билан келган масъулият ва шуҳрат юки соғлиқ билан боғлиқ муаммоларга олиб келди. У пайтда ҳомиладор бўлган Мерем фарзандини ўйлаб, сериални тарк этишга қарор қилди. Аммо мухлислар бу қарорни кечирмади — уни сериални ташлаб кетгани учун қаттиқ танқид қилишди, ҳатто айрим ҳамкасблари ҳам ундан юз ўгирди.
Ҳанде Эрчел
Ҳанде Эрчелнинг машҳурлиги оғир шахсий фожиа билан бир вақтга тўғри келди — актрисанинг онаси саратондан вафот этди. Шу пайтда “Гунеш қизлари” сериали орқали танилган Ҳанде оммавий муҳаббат билан бирга қаттиқ танқидларга ҳам дуч келди.
Айримлар уни ташқи кўриниши ва вазни учун қоралади, бошқалар актёрлик маҳоратини камситди, яна кимлардир асоссиз нафрат билдиришдан тўхтамади. Ҳанде қанчалик машҳур бўлса, унга нисбатан ҳейтерлар сони ҳам шунчалик ортди. Актриса суҳбатларидан бирида шуҳрати ортидан пайдо бўлган тролларни ҳеч қачон кечирмаслигини очиқ айтган.
Каан Урганжиоғлу
Каан Урганжиоғлу “Севги изтироби” сериалидаги Амир роли билан машҳурлик чўққисига чиқди. У ролга шу қадар чуқур киришиб кетдики, томошабинлар актёрни қаҳрамонидан ажрата олмай қолишди. Амирга бўлган нафрат тўлиқ Кааннинг ўзига кўчди.
Сериал фожиали якун топганидан кейин ҳам мухлислар актёрни бошқа образларда қабул қилишни истамади. Каанга ўз обрўсини тиклаш учун йиллар давомида қаттиқ меҳнат қилишга тўғри келди. Фақат “Адолат” сериалидаги Илгаз роли орқалигина у томошабинлар кўзида ўзини қайта исботлай олди. Бу эса унга қарийб беш йилга тушди.
Буче Бусе Қаҳрамон
“Қўрғон сирлари” сериалида Пелин образини ижро этган Буче Бусе Қаҳрамон учун машҳурлик оғир синовга айланди. У экранда Ферит Корханнинг севгилиси сифатида танилган бўлса-да, томошабинлар унинг қаҳрамонини реал ҳаёт билан чалкаштириб юборишди.
Актриса нафақат салбий изоҳлар, балки жиддий таҳдидларга ҳам дуч келди. Ҳейтерлар ҳатто унинг оиласига ҳам тинчлик бермади. Натижада Бученинг адвокати судга мурожаат қилишга мажбур бўлди.
Меҳмет Али Нурўғли
“Сўйла, Қора денгиз” сериалидаги Ведат образи Меҳмет Али Нурўғлининг ҳаётини ҳам оғирлаштирди. Қаҳрамоннинг шафқатсизлиги шунчалик ишонарли чиққанки, актёр бир неча бор таҳдидларга учради, ҳатто уни шахсан таъқиб қилиш ҳолатлари ҳам бўлган.
Актёрнинг таъкидлашича, машҳурликнинг энг қўрқинчли жиҳати — инсоннинг шахсий ҳаёти, эркинлиги ва махфийлиги йўқолишидир.
Дилан Чичек Дениз
Дилан Чичек Дениз “Чуқур” сериалидаги Сена роли билан томошабинлар меҳрини қозонди. Унинг қаҳрамони ўлими мухлислар учун оғир зарба бўлди. Аммо актриса учун асосий муаммо таъқиб эмас, балки сериалдаги зўравонлик ва оғир руҳий муҳит таъсири эди.
Дилан оғир сюжет ортидан руҳшуносга мурожаат қилишга мажбур бўлганини очиқ тан олган. Унинг айтишича, рол ва шуҳрат биргаликда унинг ички хавотирини кучайтириб, ўз ҳис-туйғуларини қаҳрамони ҳислари билан ажратишни қийинлаштирган.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
