1969 йил май ойида илк бор экранларга чиққан Сеними, шошмай тур! мультфильми кўплаб авлодлар хотирасида болаликнинг энг ёрқин ва самимий рамзларидан бири сифатида сақланиб қолган. Совет анимацияси классикасига айланган ушбу асарда бўри ва қуён ўртасидаги кулгили, бироз шум ва доимий қувлашувларга тўла саргузаштлар тасвирланади. Аммо томошабинларни кўп йиллар давомида қизиқтириб келаётган савол бор: нима учун мультфильм айнан шу ном билан аталган?
Аввало, мультфильм сарлавҳаси унинг асосий ғояси ва сюжет моҳиятини тўлиқ акс эттиради. Бўри ҳар бир серияда қуённи қувлаб, уни қўлга туширишга уринади, аммо деярли ҳар сафар омадсизликка учрайди. Энг қизиғи, ҳар бир эпизод якунида у ғазаб ва ҳазил аралаш оҳангда “Сеними, шошмай тур!” деб айтади. Бу ибора қаҳрамоннинг навбатдаги уринишига ишора бўлиб, гўё қасос олиш ваъдасидек янграйди. Шу орқали мультфильм динамикаси кучаяди ва томошабинда кейинги қисмни кутишгa қизиқиш пайдо бўлади.
Маълум бўлишича, мультфильм ижодкорлари дастлаб унга бошқа ном беришни режалаштирган. Илк ғояларда лойиҳа “Бўри ва қуён” деб аталиши керак эди. Аммо бу ном жуда оддий, қолипга тушиб қолган ва ўзига хос жозибадан йироқ деб топилган. Натижада, диққатни тортадиган, қисқа ва эсда қоларли ибора излана бошланган. Ана шу пайтда “Сеними, шошмай тур!” деган жумла энг тўғри танлов сифатида қабул қилинган, чунки у бўрининг характерини, сабрсизлигини ва ҳазиломуз қаҳрини аниқ ифода этар эди.
Яна бир муҳим жиҳат шундаки, бу ибора ўша даврда русийзабон муҳитда кундалик сўзлашув нутқида кенг тарқалган ва кўп ишлатилган. Шу сабабли мультфильм номи томошабинларга яқин, тушунарли ва “ўзимизники”дек туюлган. Бу эса унинг оммалашувига янада кучли туртки берган.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
