Хитой автомобил бозори улкан ҳажм, тезкор ривожланиш ва қаттиқ рақобат билан ажралиб туради. Аммо ҳажм ҳар доим сифат дегани эмас. Шу боис, маҳаллий бозорда қайси енгил автомобиллар энг ишончли ва муаммосиз эканини аниқлаш ҳар доим қизиқ мавзу бўлиб келган. Ana шу мақсадда China Automotive Quality Net — Хитой автомобиллар сифати тармоғи — маҳаллий заводларда ишлаб чиқарилган енгил машиналарнинг сифат рейтингини тузди.
Рейтинг натижалари кутилганидек ҳам, кутилмаган тарзда ҳам якунланди. Биринчи ўринни Audi Q6 модели эгаллади. У SAIC–Volkswagen қўшма корхонасида ишлаб чиқарилади ва фойдаланувчилардан салбий фикрлар жуда кам келиб тушган. Натижада Audi Q6 атиги 140 та “жарима” баллини тўплаб, рейтинг етакчисига айланди. Бу кўрсаткич автомобилда камчиликлар жуда оз эканини англатади.
Иккинчи ва учинчи ўринлар Honda моделларига насиб этди. Хусусан, Honda UR-V 142 балл билан иккинчи, Honda XR-V эса 143 балл билан учинчи поғонани эгаллади. Ҳар икки модель ҳам Honda–Dongfeng қўшма корхонасида ишлаб чиқарилади. Мутахассислар бу натижани Honda’нинг Хитой бозорида узоқ йиллар давомида шаклланган ишончли имиджи билан боғламоқда.
Тўртинчи ўриндан Audi’нинг яна бир модели — Q2L жой олди. FAW–Volkswagen қўшма корхонаси маҳсулоти бўлган ушбу кроссовер 145 “жарима” балли билан рейтингда юқори ўринни сақлаб қолди. Бешинчи поғона эса Honda Avancier’га насиб этди. Honda–GAC заводида ишлаб чиқарилган бу модель 146 балл тўплаб, энг сифатли бешликни якунлади.
Эътиборли жиҳати шундаки, ушбу рейтинг тўлиқ Хитойда ишлаб чиқарилган автомобиллар асосида ва хитойлик истеъмолчиларнинг ўз фикрлари ҳамда шикоятлари ҳисобга олинган ҳолда тузилган. Аммо рўйхат тепасида бирорта ҳам миллий хитой бренди йўқ. Барча етакчи ўринларни хорижий маркалар билан қўшма корхоналарда ишлаб чиқарилган моделлар эгаллаган.
Бу ҳолат Хитой автосаноати учун жиддий сигнал сифатида қабул қилинмоқда. Бир томондан, маҳаллий ишлаб чиқариш инфратузилмаси юқори даражада ишлаётганини кўрсатса, иккинчи томондан, миллий брендлар ҳали ҳам сифат бўйича етакчилардан ортда қолаётганини очиқ намоён қилади.
Хулоса қисқа: Хитойда автомобил кўп, лекин сифат масаласида ҳали ҳам ном ва тажриба ҳал қилувчи омил бўлиб қолмоқда. Миллий брендлар эса юқори поғоналарга чиқиш учун яна бироз “газни босиши”га тўғри келади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
