Өзбекстан делегациясының Францияға жасаған жұмыс сапары ел азаматтарын шетелде заңды және жүйелі түрде жұмыспен қамту бағытында маңызды қадамға айналды. Миграция агенттігі, Сыртқы істер министрлігі және Өзбекстанның Франциядағы дипломатиялық өкілдігі өкілдерінен құралған топ бірқатар ірі келісімдерге қол жеткізді.
Атап айтқанда, Францияның ауыл шаруашылығы саласындағы ірі құрылымдарының бірі — FNSEA ұйымымен ынтымақтастық туралы меморандумға қол қойылды. Оған сәйкес, өзбекстандықтар Франциядағы жүзімдіктерде маусымдық жұмыстарға тартылатын болады. Бұл еңбек көші-қонын заңдастыруға және оны қауіпсіз механизмдер арқылы жүзеге асыруға ықпал етеді.
Хабарланғандай, 2026 жылдың жаз айларынан бастап пилоттық жоба аясында алғашқы 50 үміткер Францияға жұмысқа жіберіледі. Бұл тәжірибе алдағы уақытта жобаны кеңейтуге негіз болады деп күтілуде.
Сонымен қатар, кадрларды іріктеу және жұмыспен қамтуға маманданған Sélect Recruiting Service ұйымымен де ынтымақтастық келісімі жасалды. Аталған ұйым үміткерлерді іріктеу, даярлау және жұмысқа орналастыру үдерістерін жүзеге асырады.
Тағы бір маңызды бағыт ретінде CFA AC Paris мекемесімен «оқу + жұмыс» форматында әріптестік жолға қойылды. Енді өзбек жастары Францияда мейрамхана саласында оқып, қатар жұмыс істеу мүмкіндігіне ие болады.
Келісімдерді іске асыру және ұйымдастырушылық-құқықтық мәселелерді үйлестіру мақсатында Францияның бірқатар беделді мекемелерімен келіссөздер жүргізілді. Олардың қатарында France Travail, CCI Île-de-France және AP-HP бар.
Сарапшылардың пікірінше, бұл келісімдер тек еңбек көші-қонын реттеп қана қоймай, өзбекстандықтар үшін Еуропа еңбек нарығында жаңа мүмкіндіктер ашады. Ең бастысы — барлық үдерістер заңды және ашық түрде жүзеге асырылып, азаматтардың құқықтары қорғалады.
