28 сәуірде әлемдегі жетекші электромобиль өндірушілердің бірі — BYD бірінші тоқсан бойынша қаржылық нәтижелерін жариялады. Компания есебіне сәйкес, таза пайда 4,1 миллиард юаньды (шамамен 600 миллион доллар) құрады. Бұл көрсеткіш өткен жылдың осы кезеңімен салыстырғанда 55,4 пайызға төмендеп, 2022 жылдың екінші тоқсанынан бергі ең төменгі деңгей ретінде тіркелді.
Сонымен қатар, компанияның жалпы табысы 150,2 миллиард юань (22 миллиард доллар) болды, бұл да жылдық есепте 11,8 пайыздық төмендеуді көрсетеді. Мұндай динамика нарық қатысушылары мен сарапшылардың назарын аударды.
Сарапшылардың пікірінше, мұндай әлсіз көрсеткіштердің негізгі себебі — Қытайдың ішкі нарығында электромобильдер мен гибридті көліктерге деген сұраныстың төмендеуімен байланысты. Атап айтқанда, The Wall Street Journal Қытай жеңіл автокөліктер қауымдастығының деректеріне сілтеме жасай отырып, қаңтар айында электр және гибрид көліктердің сатылымы 20 пайызға азайып, 596 мың данаға дейін төмендегенін атап өтті. Бұл 2024 жылдың ақпанынан бергі алғашқы төмендеу болды.
Сарапшылар бұл жағдайды мемлекеттік субсидиялардың мерзімі аяқталғанымен де байланыстырады. Сонымен қатар, 2026 жылдың басынан бастап жаңа энергия көздерінде жұмыс істейтін көліктерге арналған салықтық жеңілдіктердің кезең-кезеңімен жойылуы тұтынушыларды күту позициясын ұстануға мәжбүр етті.
Тағы бір маңызды фактор ретінде жүру қашықтығы аз (100 км-ден төмен) гибрид батареяларын өндіруге мемлекеттік қолдаудың қысқаруы аталып өтуде. Бұл әсіресе осы сегментке қатты тәуелді BYD сияқты өндірушілерге елеулі әсер етті.
Бұдан бөлек, Қытайдағы макроэкономикалық қысымдар да жағдайды күрделендіріп отыр. Экономикалық өсім қарқынының баяулауы, халық табысының өсуінің төмендеуі және жұмыссыздықтың артуы жалпы тұтынушылық сатып алу қабілетіне кері әсерін тигізді.
Жалпы алғанда, BYD нәтижелері тек компанияның ішкі мәселелерін ғана емес, сонымен қатар электромобильдер нарығындағы кең ауқымды өзгерістер мен қысымдарды да көрсетеді. Алдағы тоқсандарда сұраныс қалпына келе ме, әлде төмендеу жалғаса ма — бұл сұрақ әзірге ашық күйінде қалып отыр.
