«Ал-Наср» бош мураббийи Жорже Жезуш Криштиану Роналду нега яқинлашиб келаётган учрашувни ўтказиб юборишини изоҳлаб берди. Бу ҳақда euro-football.ru хабар беради.
Ар-Риёд клуби чоршанба куни ОФК Чемпионлар лигаси доирасида «Аркадаг»га қарши майдонга тушади. Португалиялик юлдуз ҳужумчи яқин орада майдонга қайтиши кутилаётган бўлса-да, бу сафар ҳам жамоа сафида бўлмайди.
«Тақвим жуда тиғиз. Шунинг учун Роналду ва асосий таркибдаги яна бир қатор футболчиларга дам беришга қарор қилдик. Олдинда «Ал-Фатех»га қарши муҳим ўйин бор», — деди Жезуш. Унинг сўзларини Al Nassr Zone келтирди.
Мутахассис Роналдуга танаффус берилиши янгилик эмаслигини ҳам таъкидлади: бу унинг Саудия Арабистонидан ташқарида ўтказиладиган учрашувларни ўтказиб юбориши биринчи ҳолат эмас.
Саудия чемпионатидаги «Ал-Фатех» — «Ал-Наср» баҳси шанба, 14-февраль куни бўлиб ўтади.
“Zamin”ни Telegram'да ўқинг!
