Испания Ла Лигаси доирасида бўлиб ўтган учрашувда "Барселона" жамоаси сафарда "Хетефе" устидан ишончли ғалабага эришди. Ўйин давомида тўлиқ устунликка эга бўлган меҳмонлар рақиб дарвозасига жавобсиз иккита тўп киритишга муваффақ бўлишди. Биринчи бўлимнинг қўшиб берилган дақиқаларида Лопес ҳисобни очган бўлса, иккинчи бўлимда Рашфорд орадаги фарқни оширди.
Статистик маълумотларга кўра, "Барселона" ўйин давомида 76 фоиз тўп назоратини ўзида сақлаб турган. Меҳмонлар жами 10 та зарба йўллаган бўлиб, улардан 4 таси дарвоза соҳасига аниқ борган. Мезбонлар эса бутун ўйин давомида фақат бир марта дарвоза соҳасига аниқ зарба бера олишди. Шунингдек, каталонияликлар 562 та пас амалга ошириб, 91 фоизлик аниқлик кўрсатишди.
Учрашув анча кескин курашларга бой бўлди, буни ҳакам томонидан кўрсатилган тўртта сариқ карточка ҳам тасдиқлайди. Ҳар икки жамоа аъзолари икки мартадан огоҳлантириш олишди. "Хетефе" футболчилари 15 марта қоида бузган бўлса, "Барселона" вакиллари 8 марта фоллар қайд этишди. Ушбу ғалаба орқали меҳмонлар турнир жадвалидаги ўз ўринларини мустаҳкамлаб олишди.
“Zamin”ни Telegram'да ўқинг!
