Бавария фахрий президенти Ули Ҳоэнесс Германия кубоги финали арафасида Хосе Моуриньо ҳақида кескин фикр билдирди. Берлин мезбонлик қилган финал ўйинига ташриф буюрган португалиялик мутахассис ҳақидаги саволга Ҳоэнесс: "Умид қиламанки, у билан учрашиб қолмайман, у бу сафарни ўтказиб юборса ҳам бўларди", — дея жавоб берди Sky нашрига. Бу ҳақда Goal.com хабар беради.
Моуриньонинг Берлинга ташрифи унинг Реал Мадрид клубига қайтиши ва Бавария қанот ҳужумчиси Майкл Олисе билан қизиқаётгани ҳақидаги хабарлар фонида юз берди. Бироқ Ҳоэнесс бу борада қатъий позициясини намойиш этди: "У хоҳлаганча кузатиши мумкин, бунинг фойдаси йўқ. Майкл Олисе сотилмайди", — дея таъкидлади 74 ёшли функционер.
Bild нашри хабарига кўра, Моуриньо финалга Бавария рақиби — ВфБ Стюттгарт таклифига биноан келган. Маълум қилинишича, мураббий Стюттгарт спорт директори Фабиан Воҳлгемут билан учрашув белгилаган. Ушбу учрашувни Моуриньонинг агенти Жорге Мендес бошқарадиган ГестиФуте агентлиги ташкиллаштирган.
Ҳозирда Хосе Моуриньо Реал Мадрид клубига қайтиши кутилмоқда. У январ ойида истеъфога чиқарилган Хаби Алонсо ўрнини эгаллаган, бироқ мавсум охирида кетиши аниқ бўлган Альваро Арбелоа ўрнини эгаллаши тахмин қилинмоқда. Шу сабабли, бир қатор юлдузлар, жумладан Олисе ҳам Мадрид клуби радарига тушган.
Майкл Олисе хизматларига Реал Мадрид билан бир қаторда Ливерпул ва Барселона ҳам қизиқиш билдирмоқда. Шунга қарамай, Бавария спорт директори Max Эберл ва клуб раҳбарияти 24 ёшли футболчини қўйиб юбормоқчи эмас. Мюнхенликларнинг асосий етакчиларидан бири бўлган Олисе клуб билан 2029-йилгача шартномага эга.
“Zamin”ни Telegram'да ўқинг!
