Барселона бош мураббийи Ханси Флик мавсум якунида ўз мураббийлар штабини тарк этаётган Тиаго Алкантара ҳақида фикр билдирди. Ярим ҳимоячиликдан мураббийликка ўтган Тиаго жума кунги машғулотлардан сўнг жамоа билан хайрлашди. Флик унинг профессионал менталитети ва клубдаги ўрни ҳақида тўхталиб, 35 ёшли мутахассисга миннатдорчилик билдирди. Бу ҳақда Goal.com хабар беради.
Тиаго Алкантара 2024-йилда Ханси Флик Камп Ноуга келганидан сўнг унинг жамоасига қўшилган эди. Гарчи у қисқа муддатга кетган бўлса-да, сентябрь ойида яна қайтиб келди. Бироқ, бир мавсумлик фаолиятдан сўнг, собиқ футболчи ўз йўлини давом эттиришга қарор қилди. Флик матбуот анжуманида Тиаго билан Бавария давридан буён давом этиб келаётган ўзаро ҳурмат ҳақида гапириб берди.
"Мен штаб ва футболчиларга Тиаго билан боғлиқ тарихимиз ҳақида айтиб бердим. Бавария клубида ёрдамчидан бош мураббийга айланганимда, илк қийин қарорларимдан бири уни захирага тушириш бўлган эди. Бу иккимиз учун ҳам оғир бўлган, чунки у жаҳон даражасидаги ўйинчи эди. Аммо унинг ўшанда кўрсатган муносабати ва профессионализми шунчаки ажойиб эди", — деди немис мутахассиси.
Тиагонинг Барселона мураббийлар штабидаги роли Фликнинг Каталония клубига мослашишида ҳал қилувчи аҳамиятга эга бўлди. Ла Масиа тарбияланувчиси бўлган ва бир неча тилларни мукаммал биладиган собиқ Ливерпул юлдузи мураббий ва кийиниш хонаси ўртасида ўзига хос кўприк вазифасини ўтади. Флик унинг клубдаги таъсирини юқори баҳолади.
"У менга бу ерда жуда кўп ёрдам берди. Тиаго элита менталитетига эга инсон. Биз уни соғинамиз, лекин унинг ўз режалари борлигини тушунаман ва буни ҳурмат қиламан. Умид қиламанки, у қачондир яна қайтиб келади, чунки футболда унга ўхшаган инсонлар керак", — дея қўшимча қилди Ханси Флик.
“Zamin”ни Telegram'да ўқинг!
