Буюк Британия Бош вазири Кеир Стармер ТНТ Sportс телеканалини Чемпионлар лигаси финали доирасидаги Арсенал ҳамда PSJ учрашувини мамлакат бўйлаб бепул эфирга узатишга чақирди. "Канонирлар" 2006-йилдан буён илк бор Европанинг энг нуфузли турнири финалида майдонга тушади, бироқ айни дамда мухлислар ушбу тарихий лаҳзани томоша қилиш учун пуллик обунага эга бўлишлари талаб этилмоқда. Бу ҳақда Goal.com хабар беради.
Маълумки, Кеир Стармер ашаддий Арсенал мухлиси ҳисобланади. У телеканал раҳбариятига йўллаган мактубида 1992-йилдан бери барча финаллар бепул кўрсатилганини эслатиб ўтди. "Мусобақа ташкил этилганидан буён ўтган 34 йил ичида илк бор ТНТ Sportс финални бепул кўрсатмасликка қарор қилганидан афсусдаман. Чемпионлар лигаси дунёдаги энг йирик клублараро мусобақа ва у футбол ватани бўлган ушбу мамлакат мухлислари учун жуда қадрли", — деб ёзади Бош вазир.
Микел Артета шогирдлари ярим финалда Атлетико Мадрид устидан ғалаба қозониб, йигирма йиллик танаффусдан сўнг Европа футболи чўққисига қайтишди. Шу ҳафтанинг ўзида 2004-йилдан бери илк бор Англия Премер-лигаси чемпионлигини қўлга киритган Лондон клуби эндиликда тарихий "дубл" қайд этишга яқин турибди. Стармернинг таъкидлашича, ўйиннинг ҳамма учун очиқ бўлиши фақат унинг шахсий қизиқишларига боғлиқ эмас.
ТНТ Sportс аввалги йилларда финални YouTube платформасида бепул трансляция қилиш анъанасидан воз кечиб, томошабинларни HBO Max платформасига йўналтирмоқда. Телеканал вакиллари ўз баёнотида учта UEFA финалларини кўриш учун 4,99 фунт стерлинг миқдоридаги бир ойлик обуна етарли эканини ва бу мухлислар учун ҳамёнбоп нарх эканини маълум қилишди.
“Zamin”ни Telegram'да ўқинг!
