Dunyodagi eng yirik video platformalardan biri — YouTube kino olamida muhim qadam tashladi. The Hollywood Reporter nashri xabar qilishicha, platforma «Oskar» kinotaqdimoti marosimini bepul jonli efirda ko‘rsatish huquqini qo‘lga kiritdi. Tomonlar o‘rtasidagi kelishuv 2029–2033-yillarni qamrab oladi.
Yangi shartnomaga ko‘ra, «Oskar» marosimi butun dunyo bo‘ylab 2 milliarddan ortiq foydalanuvchi uchun ochiq va mutlaqo bepul tarzda translyatsiya qilinadi. Bu qaror kino muxlislari uchun katta yangilik bo‘lib, marosimni tomosha qilish imkoniyatlarini ancha kengaytiradi.
Qizig‘i shundaki, YouTube faqat asosiy taqdirlash marosimini emas, balki unga bog‘liq qo‘shimcha tadbirlar, qizil gilamdagi chiqishlar va maxsus studiya dasturlarini ham namoyish qilish huquqiga ega bo‘ldi. Bu esa tomoshabinlarga «Oskar» muhitini to‘liq his qilish imkonini beradi.
Eslatib o‘tish joiz, 1976 yildan 2028 yilgacha bo‘lgan davrda «Oskar»ni translyatsiya qilish bo‘yicha eksklyuziv huquq Disney korporatsiyasiga tegishli ABC telekanali ixtiyorida bo‘lgan. Shu bois, YouTube’ning bu qarorini kino industriyasidagi yangi bosqich, deb baholash mumkin.
YouTube bosh direktori Nil Moxanning ta’kidlashicha, onlayn jonli efirlar kino san’atini global miqyosda yanada ommalashtirishga xizmat qiladi. Uning so‘zlariga ko‘ra, bu orqali yangi avlod tomoshabinlarini kino dunyosiga jalb etish, shuningdek, «Oskar» marosimini yanada ochiq va ommaviy qilish mumkin bo‘ladi.
Qisqasi, «Oskar» endi nafaqat televideniye, balki raqamli maydonda ham yangi davrni boshlamoqda. Kino muxlislari uchun esa bu — yanada qulay, yanada ochiq va zamonaviy tajriba.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
