Yirik savdo platformasi hisoblangan Wildberries raqamli xizmatlarini yanada kengaytirishni rejalashtirmoqda. RBK nashri manbalariga tayanib xabar berishicha, kompaniya onlayn kinoteatr ishga tushirish ustida ish olib bormoqda. Loyiha to‘liq amalga oshsa, Wildberries nafaqat tovarlar savdosi, balki video-kontent bozorida ham o‘z o‘rniga ega bo‘lishi mumkin.
Ma’lum qilinishicha, kompaniya avvalroq Ivi striming platformasini sotib olish ehtimolini ham muhokama qilgan. Ammo yakunda tayyor servisni xarid qilishdan voz kechib, mutlaqo yangi onlayn kinoteatrni noldan yaratish variantini ma’qul ko‘rgan. Bu esa Wildberries’ning uzoq muddatli va mustaqil strategiyaga tayanayotganini ko‘rsatadi.
Manbalarga ko‘ra, yangi striming platformasi 2026 yilda ishga tushirilishi kutilmoqda. Kontent siyosati va ijodiy yo‘nalishni esa Comedy Club Production asoschisi Artur Janibekyan nazorat qilishi mumkin. U ilgari “Nasha Russia”, “Dom-2”, “Universitet” kabi keng ommaga mashhur bo‘lgan loyihalarda ishlagani bilan tanilgan.
Shu bilan birga, Wildberries va Russ tashqi reklama operatorini birlashtiruvchi RWB matbuot xizmati mazkur ma’lumotlarga aniq munosabat bildirmadi. Kompaniya vakillari onlayn kinoteatr ishga tushirilishi haqidagi xabarlarni na tasdiqladi, na inkor etdi hamda bunday mish-mishlarga izoh berishni istamasligini qayd etdi.
E’tiborli jihati shundaki, Wildberries so‘nggi yillarda faqat elektron tijorat bilan cheklanib qolmayapti. Kompaniya TikTok’ka o‘xshash Wibes ijtimoiy tarmog‘ini ishga tushirdi, 2023 yil dekabridan esa taksi xizmati O‘zbekistonda faoliyat boshladi. Shuningdek, Fun&Sun turoperatorini sotib olishi ham Wildberries’ning servislar ekotizimini jadal kengaytirayotganini ko‘rsatadi.
Agar onlayn kinoteatr haqidagi rejalar amalga oshsa, Wildberries Rossiya va mintaqada striming bozorida jiddiy o‘yinchiga aylanishi mumkin. Bu esa raqobatni kuchaytirib, tomoshabinlar uchun yanada boy va qiziqarli kontent taklif etilishiga xizmat qiladi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
